Вевчанскиот карневал кој во изминатите години во својата програма вклучи и скандалозни, вулгарни и дискриминаторски пораки, оваа година има шанси да го врати поранешниот сјај. Оваа година, карневалот е во ново, модерно руво. Програмата ќе почне со забава, вечерта на 12 јануари, кога ќе настапат групите Pluto’s Doubts и Фолтин, и диџејот Кирил Џајковски. Наредниот ден, 13 јануари, во 13 часот ќе почне дефилето на маски.
Во пресрет на Василица и пречекот на православната Нова година, вечерта на 13-ти настапува Чалгија саунд систем. Околу илјада маски ќе дефилираат низ селото на 14 јануари, по што програмата ќе заврши тој ден попладне со традиционалното палење на маските.
Министерот за култура Роберт Алаѓозовски на прес-конференцијата рече дека Вевчанскиот карневал е бренд на Република Македонија: „Уникатен е зашто успева народните традиции да ги спои со една отворена критичка култура која Вевчанци ја негуваат. Овој фестивал има и огромен потенцијал да го развие руралниот и културниот туризам и ние во таа насока сакаме да го видиме неговиот иден развој. Министерството за култура продолжува да го поддржува карневалот“. Министерот Алаѓозовски додаде дека Вевчанскиот карневал е пример за децентрализација во културата.
„Карневалот годинава е во викенд и очекуваме многу посетители од земјава и од странство. Вевчанскиот е најстар карневал, со најдолга традиција во Македонија и пошироко. Уникатен е и единствен, а учесниците ја имаат сета слобода да критикуваат и иронизираат“, рече на прес-конференција вевчанскиот градоначалник Сашо Јанкоски.
Вевчанскиот уметник Симун Лешоски, автор на дизајнот за пасошот на Република Вевчани и на вевчанските банкноти – личници, зборуваше за сите специфични обичаи за време на карневалот, кој е стар 1.400 години и има повеќе од 10.000 посетители.
