ВЕСТ НА ДЕНОТ
Исплатена првата транша од 10,4 милиони евра за поддршка на домашните компании од унгарскиот заем
Министерството за финансии денеска од централниот Буџет до Развојната банка ја префрлило првата транша од 10,4 милиони евра, средства наменети за поддршка на домашните компании од унгарскиот заем. Како што соопштија денеска од Министерството за финансии, трансферот бил реализиран по доставено барање на Развојната банка за повлекување на средствата, а по одобрување на проектите од страна на деловните банки. Развојната банка соопшти дека денеска ја исплатила првата транша во износ од 10,4 милиони евра, кон комерцијалните банки за проекти на 47 компании, од новата кредитната линија за инвестиции и развој.
ИЗЈАВА НА ДЕНОТ
Дерала во „24 анализа“: Досегашните чекори на Владата не даваат сигнал дека земјата вистински се движи кон членство во Европската унија
Во „новото нормално“, Македонија се придвижува уште подлабоко до режими кои се оценети како авторитарни. Сакаме да припаѓаме на семејство на држави во кои нема демократија, или демократијата е под закана, во кои владее една „цврста рака“ на мал круг на луѓе, многу ниска политичка култура и изборни манипулации колку што сакате. Јасно е дека оваа власт знае дека не може да го исполни тоа што го вети. Ако внимателно се анализираа предизборните наративи, ќе беше очигледно дека нема да има напредок во евроинтеграциите – и токму тоа се случува. Настаните во ОН покажуваат дека кога е клучно, Владата се води од туѓи интереси, а не од сопствените изјави, изјави претседателот на ЦИВИЛ, Џабир Дерала.
РЕГИОН
Генералите на БиХ до Марк Руте: Александар Вучиќ и Милорад Додик се закануваат дека ќе ја распаднат БиХ
Здружението на генерали на Босна и Херцеговина испрати писмо до генералниот секретар на НАТО, Марк Руте, по повод актуелните настани во земјата и нападот врз уставниот и правниот поредок пред неговото посета на БиХ. Во писмото, генералите ја нагласуваат долгорочната посветеност на Босна кон западните и НАТО вредности, осудувајќи ги обидите на Србија и Република Српска да ги гонат официјални лица на НАТО за нивните минати интервенции.
СВЕТ
Лидерите на ЕУ на разговори за Украина во Брисел, додека континентот е на „пресвртница на историјата“
Лидерите на ЕУ се собраа денес во Брисел на специјален совет за одбрана, бидејќи францускиот претседател Емануел Макрон предупреди дека континентот е на „пресвртница на историјата“. Како и за повторно вооружување, лидерите разговараат за тоа како ова тело може дополнително да го поддржи Кијив наспроти најавата на американскиот претседател Доналд Трамп во понеделникот дека ќе ја прекине помошта за Украина. Украинскиот претседател Володими Зеленски е на самитот.
ПРАШАЊЕ НА ДЕНОТ: Како влијае покачувањето на струјата на семејниот буџет?
СОЦИЈАЛНА ПРАВДА
Минималната плата треба да се зголеми овој месец. Согласно законот, зголемувањето би требало да биде околу 1.800 денари, а синдикатот бара зголемување за 6.000 денари и придонесите за разликата до 30.000 денари, колку што би изнесувала минималната плата, да ги субвенционира Владата, пишува Дехран Муратов во „Минимална плата од 500 евра: Работниците се борат за корка леб – политичарите за гола политика!“.
Подготви: Б. Јордановска
