Во Зубин-Поток беше разоткриен графит со порака: „Кога војската ќе се врати на Косово“. Претходно се појави на фудбалски натпревар на навивачката група на Црвена Ѕвезда во Белград, а потоа и во градовите на Република Српска во Босна и Херцеговина, во Црна Гора и во Русија, јавуваат косовските медиуми. Албанија денеска по втор пат ќе го преземе претседавањето со Советот за безбедност на Обединетите нации, откако во јануари минатата година стана дел од овој форум како непостојана членка.
Ова се само дел од редакцискиот избор на ЦИВИЛ Медиа од изборот на албанските медиуми во регионот, за денешното издание на АЛ-ПРЕС.
КОСОВО
Газета Експрес: Во Зубин Поток се појави графитот „Кога војската ќе се врати на Косово“
„Во Зубин-Поток беше разоткриен графит со порака: „Кога војската ќе се врати на Косово“. Претходно се појави на фудбалски натпревар на навивачката група на Црвена Ѕвезда во Белград, а потоа и во градовите на Република Српска во Босна и Херцеговина, во Црна Гора и во Русија. Градоначалникот на Зубин-Поток посочи дека има и други графити кои промовираат веќе прогласени терористички организации како што е „Северната бригада“
Графитот „Кога војската ќе се врати на Косово“ беше изложен во четвртокот на северот населен главно со Срби, ѕид недалеку од објектот на општина Зубин-Поток.“, пренесе Газета Експрес.
Радио Косова е Лире: Следната средба меѓу премиерот на Косово, Албин Курти и претседателот на Србија, Александар Вучиќ ќе се одржи на 14 септември.
Следната средба меѓу премиерот на Косово, Албин Курти и претседателот на Србија, Александар Вучиќ ќе се одржи на 14 септември, соопшти на прес-конференција во Шпанија високиот претставник на ЕУ за надворешна политика и безбедност, Жозеп Борел. Курти и Вучиќ последен пат се сретнаа на 2 мај – девет дена по вонредните избори во северно Косово, кои беа бојкотирани од локалното српско население, пренесува Радио Косова е Лире.
АЛБАНИЈА
Репортери: Албанија денеска по втор пат го презема претседавањето со Советот за безбедност
„Албанија во петок ( денеска) по втор пат ќе го преземе претседавањето со Советот за безбедност на Обединетите нации, откако во јануари минатата година стана дел од овој форум како непостојана членка. Министерката за надворешни работи Олта Џачка во четвртокот рече дека две главни активности ќе го одбележат албанското претседателство.“, пренесе Репортери.
Панорама: Денеска започнува делењето на бесплатни учебници за учениците во основните училишта во Албанија, Рама со порака
Албанскиот премиер Еди Рама денеска најави делење бесплатни книги за сите ученици од јавните основни училишта.
Оваа нова учебна година децата од второ и трето одделение ќе добијат нови книги бесплатно без да мора да ги вратат на крајот од учебната година, пренесува Панорама.
Опинион: „Фатос Нано се бори за живот“/ Рама му ја доделува Ѕвездата на јавната благодарност
Премиерот Еди Рама денеска одлучи да му додели орден на Фатос Нано, поранешниот лидер на Социјалистичката партија.
Рама му ја подари Ѕвездата на благодарноста, нагласувајќи дека Нано се бори за живот, пренесува Опинион.
Поранешниот премиер Фатос Нано e хоспитализиран веќе една недела во приватна болница во Тирана. Албанските медиуми известуваат дека поранешниот премиер продолжува да биде на реанимација интубиран поради проблеми со дишењето и дека состојбата не е променета.
КОЛУМНА
Коха: Колку подалеку од Србија, толку е појасен погледот
„Дејан Атанацковиќ, сликар образован во Фиренца, Италија и писател, вели дека „прашањето за Косово е завршено, тоа никогаш нема да се врати во Србија“. Лазар Џамиќ, поранешен шеф за планирање и брендирање во европската централа на Гугл, нагласува дека национализацијата и траумите од минатото се трансформирани во оружје за манипулација од страна на актуелната власт во Србија. Очигледно, веројатноста еден Србин јасно да размислува за Србија се зголемува со секој километар оддалеченост од Србија.“, пишува меѓу другото авторот Енвер Робели во колумната „Колку подалеку од Србија, толку е појасен погледот“, објавена во Коха.
Д. Тахири
