Во контекст на свежо понудениот говор на омраза МРТОВ ШИПТАР ДОБАР ШИПТАР на ѕидовите на кино Маџари, да се потсетиме дека оваа форма за „дијалог“ одамна опстојува како начин да се пренесе порака на непожелност и нетрпеливост по етничка основа.

Населбата Маџари е позната по ваквиот начин на комуницирање. Имено, не толку одамна на една продавница во населбата можеше да се види графитито „Свинско за Рамазан“ и „Шиптарски п***“, покрај натписот „Комити Маџари“.Пријавата од граѓански новинар што ја објави тогаш ЦивилМедиа беше проследена со осуда од дел од читателите.
„Ова се нечесни и валкани дела на некои мои соседи, кој го отсликува нивниот неморал, неукост, вандализам, национална и верска провокација, за кое нема и не треба да има место во нашето општествено уредување“, вели тој.
Слична порака минатата година осамна и на објектот на Домот на културата „Кочо Рацин“ во центарот на Скопје.
„Чиста Македонија“ и „Смрт за шпони“ го красеа Домот извесен период до објавата на ЦивилМедиа, по што надлежните го префарбаа ѕидот.
За појаснување шпон/и се користи за навреда кај Албанците иако преводот на македонски јазик на самиот збор не го покажува тоа(деланка, ситен остар отпадок, делче од некој материјал при неговата обработка или распрскување, обично при обработка на железо).
„Позитивниот пример со Домот на културата „Кочо Рацин“, се надеваме дека ќе им послужи и на надлежните во Општина Гази Баба – не само да ги избришат овие графити, туку и да преземат мерки за санкционирање и превенција од говорот на омразата. Се разбира, тоа уште повеќе се однесува на институциите на национално ниво“, гласи изјавата на претставниците на ЦИВИЛ по повод овој случај.
Мониторинг тимот на ЦИВИЛ секојдневно детектира и архивира содржини со говор на омраза и разобличува лажни вести и дезинформации. ЦИВИЛ во континуитет ги осудува говорот на омразата, делата од омраза и насилството и бара од надлежните органи да преземат чекори за санкционирање, но и превенирање од говор на омраза. Говорот на омраза не смее да се толерира, етничката омраза мора да се надмине! – е често повторуваниот став на ЦИВИЛ.
Биљана Јордановска