Во Музејот на современа ументост во тек е фестивалот за критичка култура, КРИК, кој има за цел да ги промовира уметничките и културните практики како општествено релевантни алатки кои ќе придонесат за еманципација и демократизација на социо-културниот контекст.
Второто издание на КРИК продолжува да ги истражува односите и проникнувањата на културата – уметноста – политичкото – политиката, преку критичка рефлексија, експеримент и лабораторија преку кои ќе се преиспитуваат парадигмите на моќта, еманципаторските крстопати на политичкото и на естетското во патеката што комуницира со сите репресивни облици врз граѓанството поврзани со образовните, социјалните, културните, политичките, медиумските права и слободи.
Постојано во транзиција – заробеност во скршените огледала е генералната тематска поставеност на овогодинешниот КРИК, кој се реализира со партнерска соработка на Контрапункт со Курзив и Kulturtreger од Хрватска, SCCA – Љубљана од Словенија и SEECult.org.
Вечерва, според програмата, со почеток во 20 часот, на тема „Светот околу нас-критичките ставови во регионот“ , ќе разговараат локлни и регионални куратори и критичари.
„Ефектот на пеперутка: Од ветувањата на институционалната критика до потенцијалите на активистичката уметност“, воведното предавање на Сузана Милевска ќе започне во сабота во 20 часот, а посетителите ќе имаат можност преку модериран разговор да дискутираат за критиката, активизмот и уметноста.
КРИК преку својата програма ,се обидува да ги промовира социо-културните и уметничките практики како важна алатка со која може да се влијае врз општествените промени и преку која може да се укаже на важноста на граѓанското учество во подигање на свеста за улогата на културата и уметноста во развојните процеси на општествената демократизација.
