Пратеничката на ВМРО-ДПМНЕ, Дафина Стојановска, објави видео на кое се гледа синдикалниот лидер Слободан Трендафилов со своите малолетни деца. Таа го обвини дека злоупотребува службено возило, а владејачката партија отиде и подалеку, па преку својата Унија на жени побара од обвинителството да покрене истрага. Трендафилов реагираше остро и грубо. Премиерот Христијан Мицкоски застана во одбрана на пратеничката Дафина Стојановска и побара од Трендафилов да ѝ се извини поради недоличниот речник што го користел во јавноста.
Поранешниот шеф на военото разузнавање и професор по безбедност, Владимир Пивоваров, во изјава за Рацин.мк, тврди дека снимката индицира на работа на безбедносните служби.
Од злоупотреба на безбедносните служби за притисок врз синдикален лидер, вниманието на јавноста се насочува исклучиво кон тоа како се изразува Трендафилов во својот јавен настап во кој, меѓу другото, ѝ се заблагодари на власта за пи-арот што, според него, насмеал половина држава, а ја свртел против нив и другата половина. Тој објави и видео од изјава на пратеничката која во 2022 година им даде поддршка на синдикалните барања за повисоки плати. Јавноста се прашува – на која Дафина да ѝ верува, на таа од 2022 година или на оваа сега?
Дафина Стојановска ѝ е позната на јавноста. Токму затоа, таа се најде и во денешното ПРАШАЊЕ НА ДЕНОТ: Дафина пак се прослави – објави видео со Трендафилов и децата. Што мислите за нејзиното однесување?
