– Во однос на објавениот текст со наслов „Претседателката Силјановска Давкова избегна да одговори зошто Северна Македонија не е дел од регионалната иницијатива за одбранбена соработка меѓу Хрватска, Албанија и Косово“, Кабинетот на Претседателот ве замолува да го коригирате насловот на текстот, согласно правото на исправка. Одговор на Вашето прашање е испратен и не е избегнат одговор, како што наведувате во насловот, пишува во експресната реакција веднаш по објавување на текстот.
Точно е дека пристигна одговор на прашањето – Зошто Република Северна Македонија не е дел од оваа регионална иницијатива за одбранбена соработка во рамките на НАТО?
Исто така, точно е и дека дописот е објавен во целост. Но, како што стои и во текстот, во дописот што пристигна од претседателката Силјановска Давкова изостанува одговор на прашањето што беше поставено. Има низа други податоци. На пример, за учеството на државата во иницијативи што постојат повеќе од две децении. Но конкретен одговор на прашањето нема, што упатува на заклучокот дека се избегнува.
За волја на вистината, треба да се одбележи тоа што Претседателката е единствената која, во рекорден рок, реши да испрати (барем некаков) одговор на ова важно прашање од областа на одбраната. Истото прашање беше упатено и до премиерот Мицкоски, министерот за одбрана, Мисајловски, и министерот за надворешни работи, Муцунски. Тие не одговорија на прашањето до објавувањето и на овој текст (10 април, 21:15 часот).
Во духот на добрите намери, разбирањето, но и очекувањето дека ќе добиеме конкретен одговор на конкретно прашање, на барањето за корекција на насловот, ние одговоривме дека ќе го објавиме барањето. Притоа, во нашата повторена молба за конкретен одговор, забележавме дека ни се познати другите иницијативи за кои се зборува во дописот, вклучително и RACVIAC во која и потписникот на овој прилог беше на обука во периодот на акцијата за собирање на нелегалното оружје во 2003 година, што е долго пред нашата земја да стане членка на НАТО. Тоа навистина сведочи за континуитет на определбите на нашата земја во контекст на одбраната, регионалната соработка и членството во НАТО. Но нам ни е потребен одговор за најновиот развој на настаните и регионалната соработка во овој период.
Затоа, до претседателката испративме уште една молба да ни одговори на прашањето зошто Република Северна Македонија не е дел од регионалната иницијатива на Хрватска, Албанија и Косово за одбранбена соработка во рамките на НАТО.
Тоа прашање, меѓу другото, ги подразбира и прашањата дали имало покана, односно дали нашата земја изразила интерес и готовност за учество во конкретната иницијатива на Хрватска, Албанија и Косово за регионална соработка во областа на одбраната. Го додадовме и прашањето дали нашата претседателка и врховна командантка е во комуникација со другите земји од регионот во рамките на формирањето на мрежи на соработка во одбраната.
Џабир Дерала
