ВЕСТ НА ДЕНОТ
Основното јавно обвинителство Скопје денеска поведе постапка против вкупно 43 лица кои со различни дејствија на компјутерски измами, фалсификување исправи и злоупотреба на лични податоци учествувале во повеќекратни измами на граѓани со „брзи кредити“.
ОЈО Скопје соопшти дека за четворица од осомничените, меѓу кои и едно службено лице од Фондот за здравствено осигурување, е поведена истрага за кривични дела – Фалсификување исправа од член 378, Злоупотреба на лични податоци од член 149, Компјутерска измама од член 251-б од Кривичниот законик, додека останатите се опфатени во постапката со поединечни дејствија на помагање и соизвршителство во секој од случаите поединечно.
Така, дел од осомничените, спротивно на условите утврдени со закон и без согласност на граѓаните користеле туѓи лични податоци, правеле лажни јавни исправи и преправале вистински јавни исправи со намера таквите исправи да се употребат како вистински. Со внесување невистинити податоци во информатичките системи на десетина различни друштва за „брзи кредити“, како и со фалсификување на електронски потписи, без знаење на оштетените на нивно име земале кредити, создавајќи им обврска на лицата да ги враќаат наводно позајмените средства.
ИЗЈАВА НА ДЕНОТ
„Македонската надворешна безбедносна политика е целосно усогласена со заедничката надворешна и безбедносна политика на Европската Унија. Како членка на НАТО нашата држава има активен придонес во безбедноста на регионот. Истовремено, е активна и во Источното крило на Алијансата, преку учество на македонската Армија во мисии во регионот и во поголем број регионални безбедносни иницијативи, како и развиена билатерална безбедносна соработка со секоја од земјите од регионот“, се вели во одговорот за ЦивилМедиа од кабинетот на претседателката.
*
„Ја поздравувам најавата на претседателот Трамп за паузирање на реципрочните царини. Тоа е важен чекор кон стабилизирање на глобалната економија. Јасни, предвидливи услови се од суштинско значење за функционирањето на трговијата и синџирите на снабдување. Затоа постојано се залагав за договор за „нула за нула“ царини меѓу Европската Унија и САД. Европската Унија останува посветена на конструктивни преговори со САД, со цел да се постигне трговија без тензии и во заемна корист, потенцира претседателката на ЕК“, наведе Фон дер Лајен во објава на Икс.
РЕГИОН
Европската банка за обнова и развој (ЕБОР) со поддршка на Европската Унија изработи програма „Go Digital“, вредна 377 милиони евра, наменета за дигитализација на малите и средни претпријатија од Западниот Балкан со цел поттикнување на иновациите и растот во приватниот сектор. Програмата ќе ги нуди овие средства за малите и средни претпријатија од регионот на Западен Балкан преку заеми, грантови и техничка помош за инвестиции во дигитализација, автоматизација и зелени технологии.
СВЕТ
ЕУ планира инвестиции од 40 милијарди евра за обнова на Украина во следните три години
ЕУ планира да одвои 40 милијарди евра во следните три години за обнова на Украина, објави денеска европската комесарка за проширување Марта Кос на состанокот во Брисел посветен на економијата на земјата која е нападната од руските сили.
ФОРУМ
СЛОБОДНА ЗОНА
„Големо е таблото на кое се истакнати големите финансиски поединци кои стојат зад наводните антибугарски политики на ВМРО ДПМНЕ. Аферата со затруената Крива река само е едно конче кое не води кон клопчето од политички интереси на релација Софија – Скопје. Има и други клопчиња за подземни економски поединечни интереси кои веќе се говори деновиве а се врзани за соседна Бугарија. Тие покажуваат дека народот кај нас треба да биде жртва на вештачки создавана антиевропска клима во политичкиот амбиент“, пишува Љубомир Костовски во анализата „МУЛТИГРУП во нашиот двор: Што ќе ветиш пред изборите, се наплатува после триумфот“.
*
„Пред една недела, на КОЛЕГИУМОТ на 4 април, го изнесов моето согледување дека во очекување што ќе донесат новите тарифи на Трамп за глобалната трговија и економија, светските берзи во меѓувреме се во постојан пад, што отвара простор за берзански мешетари, како што се Трамп и олигарсите – милионери во неговото блиско опкружување, да ловат во матно и да го зголемат своето берзанско портфолио, ако тоа не беше и вистинската цел за тие да се воведат.
Во тој момент ваквиот наратив не беше во оптек, но уште тогаш кажав дека цврсто стојам позади моето излагање, и дека времето ќе покаже дали, и колку сум бил во право“, пишува Драган Мишев во колумната „НЕЛИ ВИ РЕКОВ: Незаконско профитирање на берзите во внатрешниот круг на Трамп“.
Д. Муратов
