Потпишувањето на Договорот за пријателство, добрососедство и соработка меѓу Бугарија и Македонија треба да придонесе кон почитување на европските вредности. Со Договорот се очекува засилена соработка меѓу двете земји, но и соработка на Македонија со земјите од ЕУ.
И Владата на Бугарија го одобри Договорот за пријателство, добрососедство и соработка меѓу Бугарија и Македонија, со став дека потпишувањето на Договорот е израз на желбата на Бугарија да изгради добрососедски односи засновани на европските вредности.
Бугарската Влада го одобри и Меморандумот за соработка меѓу нивното Министерството за транспорт, информатичка технологија и комуникации и Министерството на за транспорт и врски на Република Македонија за развој на железничките врски меѓу Софија и Скопје. Обврската на Бугарија е до 2027 да ја комплементира железничката врска Софија – Перник – Радомир – македонска граница, а задача на Македонија е да ја комплементира железничката врска Крива Паланка – Деве Баир – бугарска граница.
Меморандумот за соработка во областа на природниот гас меѓу Министерството за енергетика на Република Бугарија и Министерството за економија на Република Македонија подразбира и нова директна врска меѓу гасните системи.
И американскиот амбасадор во Софија, Ерик Рубин, го оцени договорот како позитивен чекор за целиот регион. На средбата со бугарскиот премиер Бојко Борисов, амбасадорот Рубин истакна дека дека ја подржуваат визијата на Бугарија, давајќи ѝ можност да одигра клучна улога, како следен претседавач со ЕУ.
Во Македонија, само опозициската ВМРО-ДПМНЕ и понатаму е сомничава кон Договорот. Партијата бара итна, јавна и отворена седница на Собранието за Договорот. Според изјавата на Илија Димовски, ВМРО-ДПМНЕ смета дека договорот е штетен за Македонија, односно дека Собранието треба да го разгледа договорот и да донесе заклучоци дали треба да се потпише или не. Димовски истакна дека ВМРО-ДПМНЕ ќе поддржи само договор што на Македонија ќе ѝовозможи брз влез во Европската унија и во НАТО, а не договор кој ќе биде користен како алатка за одолговлекување.
Исто така, на прес-конференција, Димовски ја обвини Владата дека не нуди инклузивност, транспарентност и одговорност, односно, дека од премиерот била ветена можност за подобрувања и измени, а се претставува текст кој, според официјална Софија, не може да претрпи никакви измени. Димовски побара договорот да се потпише со забелешките кои пратениците на ВМРО-ДПМНЕ му ги посочиле на премиерот Заев.
