ВЕСТ НА ДЕНОТ
Уставен ја укина Одлуката за ДУП во Центар, кој ги опфаќа и атрактивните парцели на Водно
Уставниот суд на денешната седница ја укина Одлуката со која на 18 јули 2014-та година Советот на Општина Центар го донесе Детален урбанистички план Градска четврт Ј 07 со локалитети Капиштец, Завод за медицинска рехабилитација, Старо Водно, Долно Водно, Мало Курило, Цвеќара.
-Судот оцени дека Одлуката за ДУП на Општина Центар е спротивна на Законот за локална самоуправа, поточно со членот 62 став 2 од овој Закон. Уставниот суд оцени дека не било обезбедено потребното мнозинство од 12 гласа „за“, како што предвидува Законот, изјави по денешната седница портпаролка на Уставниот суд, Христина Беловска.
ИЗЈАВА НА ДЕНОТ
Ковачевски за „Политика“: Одговорните политичари ја препознаваат шансата, ќе се постигне европско мнозинство во Парламентот
„Верувам дека во нашата држава е можно да се постигне европско парламентарно мнозинство кое ќе ја обезбеди европската иднина на Северна Македонија, бидејќи тоа е стратешки цел поставен од независноста на државата, а шансите за членство во ЕУ никогаш не биле поголеми и пореални“ изјави премиерот Димитар Ковачевски во интервју за српска „Политика“. Тој додаде дека одговорните политичари, лидери и пратениците го препознаваат тоа и ќе донесат разумни одлуки.
ФЛЕШ ВЕСТИ
РЕАКЦИЈА Во нашата држава секогаш има фактори кои сакаат Република Северна Македонија да се одвлече од патот на ЕУ и да се одржи перманентна латентна криза, затоа што тогаш трети фактори од надвор најдобро го имаат своето влијание, изјави денеска министерот за надворешни работи Бујар Османи.
EВРОИНТЕГРАЦИИ Евроамбасадорот Дејвид Гир денеска порача дека на земјава и е неопходна стручна, независна и професионална јавна администрација. Без тоа, како што нагласи, нема раст и развој. Не може да се каже, рече Гир, дека нема резултати во однос на реорганизацијата, но системот има и слабости кои се секако нотирани, а евидентно е и премногу силно партиско влијание во одредени делови од администрацијата.
ПОЛИТИКА Министерството не е мое, сигурно ќе го наследи некој по мене. Вака одговори денеска министерот за здравство Беким Сали на прашање дали ќе го отстапи Министерството за здравство на Алијанса за Албанците или ќе има излез од владата.
СТРУЈА Од почетокот на годината се произведени и продадени вкупно 3 390 мегават часови електрична енергија како ноќни вишоци, од кои 1 140 по цена од 103 евра по мегават час и 2 540 по цена од 98 евра по мегаватачас, информираше денеска владиниот соработник за енергетика Виктор Андонов, истакнувајќи дека тие количества се продадени во транспарентна постапка од страна на ЕСМ.
РЕГИОН Американската амбасада во Приштина, најави дека на 31 јануари ќе одржи дискусија за Заедницата на српските општини (ЗСО) во Косово.
„Покануваме разновидна група лидери на граѓанското општество, владини претставници, политички лидери и дипломати да разговараат за ова важно прашање, пренесува РСЕ. Косово и Србија постигнаа договор за ЗСО во 2013 година, а потоа во 2015 година за принципите за нејзино формирање. Во 2015 година, Уставниот суд на Косово утврди дека договорот не е во целосна усогласеност со Уставот.
ВОЈНА ВО УКРАИНА
Италијанскиот парламент ја поедноставува процедура за испорака на оружје за Украина
Долниот дом на италијанскиот парламент одобри владина резолуција со која значително се поедноставува процедурата за снабдување на Украина со оружје до крајот на годината, наведува РАИ, пренесува Укринформ.„Украина доби зелено светло од Домот на пратеници, кој го продолжува овластувањето за трансфер на воени возила, материјали и опрема во Кијив за една година, до 31 декември 2023 година“, се вели во написот.
(ИЗБОР) Албански медиуми
Сагата со албанските емигранти во Велика Британија продолжува, а денешниот фокус на медиумите во Албанија е исчезнувањето на околу 200 малолетни имигранти Албанци во Британија, како и апсењето на поранешен функционер на ФБИ кој медиумите го поврзуваат со Еди Рама.
АНАЛИЗИ
Пристапот на Србија кон нормализација на односите со Косово по се изгледа доби нова динамика, по пристигнувањето на петтемина дипломати прво во Косово, а потоа и во Србија која ризикува изолација од Европската Унија и Соединетите Американски Држави (САД) доколку не се согласи да соработува во реализацијата на француско-германскиот план за нормализација на односите со Косово, соопшти српскиот претседател Александер Вучиќ на прес-конференција што ја одржа по учеството на владиниот состанок, пишува во анализата Назми Абдурахмани.
СЛОБОДНА ЗОНА
Вучиќ уште еднаш покажа дека одлично ја познава меѓународната и балканската политичка реалност. И уште повеќе, ја покажа својата извонредна способност да се прилагоди на таа реалност. Во долгото видео обраќање, навидум неволно, со познатите обвиненија на сметка на Западот, српскиот претседател кажа дека, сепак, е спремен да го исполни германско-францускиот план за нормализација на односите меѓу Србија и Косово. Образложението му беше реалистично – ако не го прифати планот, Србија ќе биде изолирана и сиромашна (како македонската држава во време на Груевски). А патот е цврсто трасиран – членство во ЕУ, тоа недвосмислено го кажа српскиот властодржец, пишува Џабир Дерала во колумната „ Еуро Вучиќ – Хардкор Вучиќ, 1:0“
Настана голема „фуртутма“ (читај, неред, збрка, конфузија) околу претепувањето на младиот охриѓанец, извесен Христијан Пендиков, секретар на културниот центар „Цар Борис трети“. За жал, и такви работи се случуваат низ улиците и „ноќните кафеани“ било каде на земјината топка, но од друга страна, тоа би било само уште една ефемерна вест од рубриката „црната хроника“ низ нашиот сајбер простор, ако, само за момент, немаше околу таквата вест „специфични околности“ заради кои се случила на прво место. Да го искористам сега пледоајето на Дејвид Сашет алијас Херкул Поаро, па да видиме кои се мотивите на овој немил настан, драг мој господине Хејстингс!, пишува ненад Јовановиќ во колумната „ Предрасуда која бара да скрши нечија глава“
Американската академија за филмски уметности и науки (АМПАС) ги објави номинациите за наградите „Оскар“ што ќе бидат свечено доделени на 12 март во киното „Долби“ во Лос Анџелес. Научно-фантастичната акциона комедија „Сѐ во исто време“ („Everything Everywhere All at Once“) на Дан Кван и Дениел Шнејнерт (Dan Kwan, Daniel Scheinert) доби најмногу номинации, 11, додека воената драма на „Нетфликс“, „Сѐ е тивко на Западниот фронт“ („All Quiet on the Western Front“, според романот „На запад ништо ново“ од Ерих Марија Ремарк) на Едвард Бергер (Edward Berger) и драмската комедија „The Banshees of Inisherin“ Мартин МекДона (Martin McDonagh) освоија по девет номинации, пишува Стојан Синадинов во анализата „Македонски филмови за „Оскари“: Дали на следната номинација ќе чекаме уште 15-тина години?
С.Танеска
