Ромите не се само Роми за 8-ми април, тие се Роми и утредента. Видовме изјави дека се ќе биде супер, но еве денеска, после четири дена Ромите веќе никој не ги спомнува. Дури нема ниту говор на омраза овие четири дена по меѓународниот ден на Ромите. Тоа е она што се вика бавен процес – изјави дека ќе има некаква стратегија, имплементација, вработување, изјави денеска во Утрински брифинг Дехран Муратов од ЦИВИЛ.
Кај нас се постои на хартија. Ние така функционираме. Сите Закони постојат на хартија. Имаме убави Закони, но кога ќе дојдат за имплементација тие како да се заташкуваат, не се имплементираат толку бргу.
Зошто е тоа така… Имавме стратегија за Ромите до 2021. Сега имаме нова стратегија, која што ќе трае неколку години. Она што е интересно е што ние правиме стратегии и тие кога ќе заврши таа стратегија тука се завршува. Не е потребна нова стратегија, тука истата треба да продолжи. Ако имаме стратегија за вдомување, за вработување, и ако тој проблем се заврши, ние веќе треба да бараме нивно внесување во системот, а не да ги оставиме на улица и да се снаоѓаат како знаат и умеат, бидејќи тие повторно ќе станат терет на државата, додава Муратов.
Муратов се осврна на континуираниот недостаток од матичен гинеколог во општина Шуто Оризари.
Во Шуто Оризари повторно нема гинеколог. Верувам дека сега, на следните парламентарни избори, а можеби ќе има и предвремени, повторно ќе има средби со министер за здравство, кој и да е во моментот, ќе се слика со некој гинеколог, ќе завршат изборите, ќе остане тој гинеколог уште еден, два три месеци, и потоа тој ќе замине. Дури и со субвенции, и плус бенефиции од државата, тој сепак после неколку месеци заминува од таа општина, од икс причини. Организациите што работат на оваа тема, треба да се осврнат на вистинските причини, зошто е тоа така, а не само да критикуваат.
Можеби има вистинска причина зошто тие гинеколози остануваат само неколку месеци во таа општина, и потоа заминуваат. Можеби треба да се направат други стратегии како да се задржат тие гинеколози. Последниот гинеколог што работеше во општината, од министерство беа свесни дека ќе му заврши работниот век, и во меѓувреме не се направија напори да се најде нов. И сега тие жени повторно немаат гинеколог, повторно тие жени патуваат до други општини каде што има гинеколог, е се изложуваат на дополнителни трошоци.
Тоа што сакам да го кажам е дека на овој начин, дел од политичарите собираат политички поени.
Во однос на дискриминацијата на Ромите од политичките чинители и од генералното општество, Муратов посочи дека довербата во ромската заедница кога се работи за политички позиции со егзекутивен карактер, е минимална.
Во составот на оваа влада немаме министер, имаме само еден или советници и еден пратеник, и толку тука завршува првиот ешалон. Во вториот ешалон немаме директори, и подолу можеби има уште нешто. Сакам да кажам дека се уште нема доволно верба во ромската заедница, да им се дадат функции коишто се одлучувачки и кои имаат буџет. Не можеш да правиш некаква политика, ако немаш буџет. Ако сум некој советник, може да имам супер идеи, но сум само советник, и немам буџет со кој можам да располагам. Можам да кажам дека треба да се изградат три објекти со социјални станови, за да се вдомат бездомници коишто се Роми, но кога немам буџет, треба да молам некого. И пред овој состав имаше Роми министри без ресор, но немаа буџет. Тие беа само како декор, и да ги задоволат политичките апетити.
На Ромите не им се остава доволно простор да работат за Ромите. Ромите треба да бидат дел од таа одлучувачка со буџет политика, затоа што најдобро ги знаат проблемите, посочува Муратов.
Во однос на бројките на ромското население што излегоа од последниот попис и одредените изразени незадоволства од исходот, Муратов вели дека нема да дозволи некој во негово име да лицитира и преговара за тие бројки.
Ние во ЦИВИЛ во изминатиот период имавме многу дебати и истражувања што се однесува до пописот на населението. Во периодот по одложувањето на пописот, имаше ромски организации кои во име на Ромите делеа пакети, за да им го подигнат чувството на ромска припадност. Но откако изборите се одложија за октомври, а пописот се одложи за септември, тие пакети одеднаш престанаа да ги делат, и чувството на ромска припадност тука застана.
Бројките се тие, јас верувам во пописот, верувам во статистиката, затоа што пописот е статистика, не е политика. За жал, сега дел од политичарите коишто „во име на Ромите“ ќе лицитираат со бројки. Јас не сум бројка, како индивидуа, јас сум личност која што ги ужива истите права со сите други етнички заедници. Ако ние целиме кон едно општество кое ќе биде еднакво и праведно, јас нема да сум бројка и процент. Ако некој сака да ме претстави како бројка и процент, за потоа да седне на маса и да преговара во мое има за тој да си се смести некаде, зборувам за политичарите, нема да застанам зад него и да кажам лицитирај и преговарај во мое име, порача Муратов.
Д. Т.
