Претседателот на САД, Доналд Трамп, на 2 ноември изјави дека засега не планира да ѝ обезбеди на Украина крстосувачки ракети Томахавк со долг дострел, пренесува Кијив Индипендент.
Кога новинарите го прашаа дали неговата администрација размислува да испрати „Томахавк“ од Кијив, Трамп одговори:
„Не, не баш… работите можат да се променат, но во овој момент не размислувам“.
Неговите забелешки доаѓаат по неодамнешните извештаи дека Пентагон сигнализирал дека има доволен инвентар на „Томахавк“ доколку Белата куќа даде зелено светло за трансфер во Украина.
„Томахавк“ е подзвучна ракета со долг дострел способна да погоди цели на дострел од 1.600 до 2.500 километри (1.000-1600 милји). Обезбедувањето оружје би претставувало „квалитативно нова фаза на ескалација“, предупреди рускиот претседател Владимир Путин.
Експертите велат дека ова оружје со долг дострел, доколку биде одобрено, би ѝ овозможило на Украина да погоди воени цели длабоко во Русија и да го зголеми притисокот врз Путин, давајќи му на Кијив поголема моќ во идните мировни преговори.
Подоцна, новинарите прашаа што ќе биде „последната капка“ што ќе му докаже на Трамп дека Путин не е подготвен да ја заврши војната во Украина.
„Нема последна капка. Понекогаш мора да го оставите да заврши, тоа беше тешка војна за Путин, тој изгуби многу војници, можеби многу милиони. Беше тешко за Украина, тешко и за двете. Понекогаш мора да го оставите да заврши“, рече тој.
Трамп беше прашан и за замрзнатите руски средства и дали би ги користел како лост.
„Европа и Русија водат разговори, јас не сум вклучен во тие дискусии“, одговори тој.
Се проценува дека 300 милијарди долари резерви на руската централна банка остануваат замрзнати на глобално ниво, од кои околу две третини – приближно 185 милијарди евра – ги држи финансиската институција Euroclear со седиште во Белгија.
Во одделно интервју за CBS News на 31 октомври, Трамп рече дека верува оти економскиот притисок врз Русија функционира, но истакна дека ситуацијата е поинаква отколку со другите земји, бидејќи САД не „соработуваат многу со Русија“.
Трамп претходно воведе 50% царини врз Индија за да изврши притисок врз неа да ги намали купувањата на руска енергија, а воведе и санкции врз руските нафтени гиганти „Роснефт“ и „Лукоил“.
Нарекувајќи ги Путин и кинескиот претседател Си Џинпинг „паметни“ и „многу силни лидери“ со кои „не треба да се игра“, Трамп рече дека рускиот претседател сака да соработува со САД и „да заработи многу пари за Русија“.
Трамп, исто така, коментираше за неговата неодамнешна најава за нуклеарни тестови на САД, велејќи дека тоа е одговор на слични вежби објавени од Москва. Американскиот претседател додаде дека „Северна Кореја постојано тестира“ и тврдеше дека Кина, исто така, тајно спроведува тестови.
„Не сакам да бидам единствената земја што не тестира“.
Трамп на 30 октомври изјави дека му наложил на Пентагон да продолжи со тестирањето на нуклеарно оружје за прв пат од 1992 година, неколку дена откако Москва ги објави своите тестови на новоразвиената крстосувачка ракета „Буревестник“ со нуклеарен погон.
Во меѓувреме, Русија продолжува со ракетниот терор врз Украина. Најмалку 15 цивили се убиени, а 20 други се повредени во текот на изминатиот ден во руските напади низ Украина, откако Русија ја таргетираше Украина со две балистички ракети „Искандер М“ и 79 дронови за напад, вклучувајќи околу 50 дронови од типот „Шахед“, како и дронови „Гербера“ и мамки.
Д. Мишев
