Секретарката на медијаторот Метју Нимиц, со грчко потекло, за Обединета Македонска Дијаспора е доволна причина за конфликт на интереси во решавање на спорот со името меѓу Македонија и Грција, како и личните донации во знак на поддршка на носителот на грчката група на пријатели, конгресменката Каролин Малони.
Како што велат од ОМД, ОН и Нимиц продолжуваат да ја прекршуваат Привремената спогодба од 1995 и ја погазуваат Универзалната декларација за човекови права, и тоа на делот што се однесува на принципот самоопределување. Или според нив, ниту овие проговори нема да резултираат во корист на Македонија.
„ОМД го потсетува Нимиц дека македонскиот народ во татковината, соседните држави на Македонија и во светот, најостро реагира на кршењето на Универзалната Декларација за човекови права, преку обидот за решавање на спорот за името, како и разговори околу промена на Македонскиот идентитет и јазик, што е недозволиво и крајно навредливо“, се вели во соопштението.
И бидејќи ОМД е многу загрижена што се случува, тековно, во Македонија, се надева дека со здружени сили со движењето #НиеСмеМакедонија, активно ќе делуваат да не загине името македонско.
„ ОМД, заедно со другите македонските организации во светот, здружено застанаа под движењето #НиеСмеМакедонија кое никогаш нема да прифати кршење на нашето основно човеково право на самоопределување како македонци и активно ќе делува во сите држави да го промовира, а не уништи нашето Македонско име, јазик и култура“, стои во соопштението (печатните грешки се намерно оставени)
Во прилог на задржување на името, може да се пополни и онлајн петиција за поддршка на единствениот начин за решавање на проблемот со името во Обединетите нации, а тоа е Резолуцијата на Генералното собрание на Обединетите нации за продолжување на членството на државата, привремено означено како “Поранешна Југословенска Република Македонија” според нејзиното официјално уставно име Република Македонија.
Б.Ј.
