ТЕМА НА ДЕНОТ
Денот на албанското знаме: Од достоинствени прослави, до сквернавење на државно знаме
Во вечерните часови, денот на знамето беше одбележан со колони возила со развеани албански знамиња низ неколку општини во земјава, а во текот на прославата се случија и неколку инциденти во кои беше газено и палено знамето на Република Северна Македонија, што предизвика осуда од политичките претставници на различни партии, но и од голем дел граѓани од сите етнички заедници, вклучувајќи ги и Албанците.
ВМРО-ДПМНЕ, СДСМ, ДУИ, ВЛЕН, ЗНАМ и Левица ги осудија инцидентите со сквернавењето на македонското знаме во текот на вечерните прослави.
Од Јавното обвинителство соопштија дека преземаат дејствија за расчистување на настанот со сквернавењето на македонското знаме за време на прославата на Денот на албанското знаме, информираат од ЈОРСМ.
Од МВР јавуваат дека до сега се приведени осум лица кои учествувале во инцидентите кога, по повод прославата на Денот на албанското знаме, беше осквернавено македонското знаме. Министерот за внатрешни работи Панче Тошковски денеска во изјава за медиумите рече дека четворица од нив се сомничат согласно член 319 од Кривичниот законик што се однесува на „предизвикување национална, расна и верска омраза, раздор и нетрпеливост“ за што е предвидена казна затвор од минимум една година.
ЦИВИЛ –Центар за слобода во соопштение до јавноста упати остра и недвосмислена осуда за инцидентите со палење на државното знаме во кои беа инволвирани млади луѓе, вклучително и малолетници, под влијание на опасната националистичка реторика.
„Овие дела не само што симболизираат деструктивност и непочитување на принципите на соживотот и мултикултурализмот, туку и ја продлабочуваат омразата и поделеноста во нашето општество.“, порачуваат од ЦИВИЛ.
ЦИВИЛ упати повик до сите одговорни институции, лидерите во заедниците, но и родителите, просветните работници, граѓанските организации и сите одговорни и достоинствени луѓе да преземат итни мерки за промовирање на толеранцијата и да преземат итни чекори за интензивна едукација против омразата по било која основа.
По синоќешните инциденти, на социјалните мрежи не изостанаа ниту коментарите со говор на омраза, кои мониторинг тимот на ЦИВИЛ ги архивира и по кои, како што е вообичаено, ќе излезе со јавен извештај, анализи и препораки.
ИЗЈАВА НА ДЕНОТ
Георгиевски: Владата покажува тотална безидејност, Македонија е во тунел без излез на патот кон ЕУ
Корубин: СДСМ веднаш да ги предложи уставните амандмани и ќе видиме како ќе одговори власта
Величковски: Инсистирањето на „црвени линии“ и барањето “гаранции“ како вештачки теми ќе траат се до првата посериозна економска нестабилност или економска слабост на Владата
РЕГИОН
Бугарија ниту по осми пат не успеа да избере претседател
Ниту по осмиот обид, 51. состав на Народно собрание на Бугарија не избра свој претседател, јави БТА, пренесе МИА.
Во вториот круг гласање се соочија Наталија Киселова од „БСП-Обединета левица“ и Силви Кирилов од „Има таков народ“, но ниту еден од нив не доби потребен број гласови.
СВЕТ
Советот на ЕУ ја именуваше новата Европска комисија
Советот на ЕУ ја именуваше новата Европска комисија со мандат за периодот од 1 декември 2024 до 31 октомври 2029 година, отако претходно во средата таа беше одобрена и од Европскиот парламент со 370 гласа „за“, 282 „против“ и 36 „воздржани“, пренесе МИА.
Со ова заврши и формалната процедура за изборот на новата Европска комисија на Урсула фон дер Лајен, со што таа ќе може официјално да стапи на должност в недела.
ГРАЃАНСКА АКЦИЈА
ПРАШАЊЕ НА ДЕНОТ: Што очекувате од новогодишната потрошувачка кошничка?
СЛОБОДНА ЗОНА
„29-ти ноември, датум кога во еден студен зимски ден пред 83 години, во едно антифашистичкото време во босанското Јајце, е зачната државата Македонија која низ тригодишни романтизми и хероизми, низ битки и жртви, низ крварења и страдања, сега во еден жежок летен асномски ден 44-тата, го вдиша првиот здив и го воскликна својот историски државотворен живот и, да, кажано и во оваа една реченица, тогаш се случи државата Македонија, а се случи затоа што, за среќа на Македонија, тогаш ја немаше ВМРО и, посебно што, со таа своја партиска антимакедонска доктрина, ич ја немаше и ДПМНЕ“, пишува Зоран Иванов.
Д. Муратов
