Претседателката Османи веднаш побара од Владата суспендирање на царината за американските производи, сметајќи го тоа како важен чекор за продлабочување на односите со најблискиот сојузник на Косово и за испраќање јасна порака за посветеноста на Косово за поцврсти односи со САД. На повикот се приклучи и Стопанската комора на Косово, јавуваат косовските медиуми.
Албанскиот премиер Еди Рама вели дека Албанија има шанса да ги отвори сите групни поглавја од преговорите со Европската унија во текот на годината, пренесоа албанските медиуми.
Во продолжение се поместени содржините од денешниот редакциски избор на ЦивилМедиа, од албанските медиуми во регионот
КОСОВО
Радио Косова е лире: Претседателството и Владата на Косово неусогласени околу суспендирање на царините за американски производи
Одлуката на претседателот на САД, Доналд Трамп, да воведе царина од 10 отсто за Косово, предизвика жесток судир меѓу претседателката на Косово, Вјоса Османи и владата. Претседателката Османи веднаш побара од Владата суспендирање на царината за американските производи, сметајќи го тоа како важен чекор за продлабочување на односите со најблискиот сојузник на Косово и за испраќање јасна порака за посветеноста на Косово за поцврсти односи со САД.
Актуелниот министер за финансии, Хекуран Мурати, и возврати на Османи, нагласувајќи дека Владата го испитува случајот и дека соодветно ќе ја информира јавноста секогаш кога ќе се донесе одлука.
На ова остро реагираше советникот за медиуми на претседателката, Беким Купина. Тој го критикуваше Мурат за неговата неусогласеност со уставните и стратешките концепти на надворешната политика, нарекувајќи го министерот како „човек кој се уште не разбрал дека водењето на државата е работа 24/7“ и дека „дефинициите за надворешната политика ги одредува институцијата Претседател“, пренесе Радио Косова е лире.
Газета експрес: Стопанската комора на Косово повика на укинување на царините кон САД: Тоа ќе отвори нови можности за економски развој
Косовската влада е повикана да ги отстрани тарифите што беа воведени за американски стоки откако администрацијата на Трамп воведе царина од 10 отсто за косовски стоки што одат во САД.
На овие повици им се приклучи и Стопанската комора на Косово, која соопшти дека „силно го поддржува“ повикот на претседателката Вјоса Османи до Владата на Косово за укинување на царинските тарифи за американските стоки, пренесе Газета експрес.
Еуроњуз: Трамп бара земји за испраќање на депортираните од САД, меѓу кои и Косово
Администрацијата на претседателот Доналд Трамп ја разгледува можноста за постигнување договори со неколку држави за прифаќање на имигрантите депортирани од САД.
Како што пренесува „Волстрит журнал“, Косово е меѓу земјите од кои Трамп побарал да примат депортирани.
„Американската администрација се надева дека овие држави ќе се согласат, можеби во замена за финансиски договори или политички придобивки. Меѓу државите од кои САД побараа да прифатат депортирани имигранти се Либија, Руанда, Бенин, Есватини, Молдавија, Монголија и Косово“, пишува „Волстрит журнал“, повикувајќи се на извори запознаени со процесот, пренесе Еуроњуз.
АЛБАНИЈА
Коха јоне – Рама: Оваа година имаме добра шанса да ги отвориме сите групни поглавја на преговори
Премиерот Еди Рама денеска изјави дека Албанија има шанса да ги отвори сите групни поглавја од преговорите со Европската унија во текот на годината. Понатаму, Рама додаде дека е првпат ѕвездите на Албанија да се на иста линија со оние на ЕУ.
„Првпат нашите ѕвезди се усогласуваат со ѕвездите на ЕУ, и за иднината и перспективата, но и за сегашноста. ЕУ беше внимателна да каже дека нашата земја е во Европа, дека хоризонтот е местото каде што ќе се приклучиме, но никогаш не сме се чувствувале подготвени да го направиме ова реалност сега. луѓе, дали вратата е отворена, пренесе Коха јоне.
Топ чанел: Албанија се простува со иконата на албанската кинематографија, Маргарита Џепа
Вчера почина иконата на албанската кинематографија, Маргарита Џепа ,неколку часа по нејзиниот 91 роденден, пренесе Топ Чанел.
Телото на големата актерка пристигна во Народниот театар за опера и балет, каде граѓаните ќе можат да и оддадат почит.
Маргарита Џепа е родена на 2 април 1934 година во градот Лушња. Зад себе остави стотина улоги, за кои ја доби титулата „Чест на нацијата“ и одликувањето „Ѓерѓ Кастриот Скендербеу“. Сепак, трите деца што ги остави зад себе ги сметаше за најголема гордост во животот, од кои едното, Ндричим Џепа, тргна по стапките на актерката, подеднакво се истакнува на албанската уметничка сцена.
КОЛУМНА
Коха: Невозможната мисија на Соренсен
„Денес, во 2025 година, не постои ниту еден од потребните предуслови за унапредување на дијалогот. Во надворешна смисла, имаме Вашингтон кој е тотално незаинтересиран за нашиот регион и кој го гледа трансатлантскиот сојуз како товар што мора да се отстрани, а не како предност што мора да се зачува.
Во ЕУ, војната во Украина го оддалечи вниманието од нашиот регион, додека подемот на екстремната десница ги направи традиционалните демократски политичари повнимателни за унапредување на агендата за проширување. Во меѓувреме, како што минува секој ден, во европските канцеларии има се помалку време, внимание и енергија за теми како што е дијалогот за нормализација на односите меѓу Косово и Србија.
Така што, во споредба со 2020 година, во 2025 година не постои ниту еден од потребните предуслови за унапредување на дијалогот. Сега единствена надеж останува Соренсен. И иако велат дека надежта не е стратегија, Соренсен иронично може да се радува на оваа тешка ситуација во која се наоѓа во 2025 година. Во случај на неуспех, вината нема да биде негова. Се беше против него во 2025. А во случај на невозможно сценарио за успех, заслугата ќе биде само негова“, пишува Авторот Демуш Шаша во колумната „Невозможната мисија на Соренсен“, објавена во косовскиот дневник Коха.
Подготви: Д. Тахири
