Родовата еднаквост е едно од човековите права за кои ЦИВИЛ, како организација за човекови права и слободи, постојано укажува дека декларативното залагање за подобрување на состојбите во однос на овие права, се во длабок дисбаланс со реалноста.
Бројни граѓанки од сите сфери на општествената и политичката сцена во земјава укажуваат на најразлични проблеми преку дискурсот за родовата еднаквост, многу од нив даваат и примери за решенија, кои освен на декларативно ниво, во реалноста не се остваруваат.
Кој е виновен, односно каде е одговорноста за дисбалансот во родовата еднаквост, кои се главните причини, дали и колку жените си ги знаат своите права, кои би биле евентуалните трајни решенија во однос на дискриминацијата на жените на институционално и општествено ниво и нивната заштита почнувајќи од семејството, општеството, работните места….
На самиот крај на 2021 година, на 10 декември, ЦИВИЛ одржа извонредна панел дискусија на тема „Родова еднаквост, меѓу декларациите и реалноста“, на која учествуваа осум извонредни жени од различни професии, секоја со свое видување и пристап кон овој проблем.
На панелот учествуваа Драгана Стојчевска, режисерка и активистка, Елена Димушевска од Национална мрежа против насилство врз жените, Леунора Калиќи од иницијативата „Ајо“, Алмира Фазли од Иницијатива на жени Шуто Оризари, Николина Кениг – професорка на Филозофски факултет, Весна Попоска, деканка на Правен факултет, Рита Бехадини од Mollëkuqja (Бубамара),и Стојна Митева од Скај плус Струмица.
Денеска, ден по одбележувањето на Меѓународниот ден на жената, 8 Март, ќе се потсетиме на извонредните пораки од учесничките на овој настан.
Би повикала на заедничка енергична акција за трансформација на културата, да направиме да е срамота некој да има сексистички ставови, порача меѓу другото проф. Николина Кениг.
„Сакам да кажам дека, столбовите на коишто се потпираат сите форми на родово засновано насилство, вклучувајќи го и семејното, некако како да бегаат од фокусот. Кога зборувам за стожери, мислам пред се на родовите норми, кои произлегуваат од патријархалната вредносна матрица од една страна, и структурната нееднаквост, односно нееднаквоста на моќ помеѓу жените и мажите, било да е реална, или симболична.“, вели Кениг.
Институциите да имаат ефективна кривична правда и процесуирање на делата кои атакуваат жени, порача деканката на Правниот факултет „Визион“, Весна Попоска.
„Јас сум првата жена што докторирала на Воената академија, што е третирана како „машка“ професија. Родовата еднаквост не е само бројка. Ако веќе се изборивме за некаков родов квантитет, треба да се бориме и за квалитет. Недостига институционална одговорност на повисоки нивоа. Жртвите не им веруваат на институциите. Видовме дека во преговорите за нова Влада, ниту еден политичар или министер не истакнаа ниту едно име на жена од помалите етнички заедници, да им се даде одредена функција. Национализмот носи сензационализам и не носи ништо добро.
Имавме лица кои револуција ќе кренат заради промена на името на државата, но никогаш не можат да замислат жена им да си го задржи презимето, нагласи меѓу другото Попоска.
Попоска: Институциите да имаат ефективна кривична правда и процесуирање на делата кои атакуваат жени
Жените повеќе да се поддржуваат меѓу себе, отколку да водат борба една против друга, порача Леунора Калиќи од иницијативата „Ајо“ („Таа“).
„Полето на делување на жените е тесно поло, и треба целата борба да се фокусира на подобрување на условите на жените. Жените повеќе да се поддржуваат меѓу себе, отколку да водат борба една против друга. Жените треба да се свесни дека се човечко суштество и дека имаме исти права и мора да најдеме храброст меѓу себе да се соочиме со сите предизвици и нашите цели да ги насочиме во борба кон неправедноста околу нас и на тој начин да направиме подобро општество за сите“, нагласи Калиќи.
Калиќи: Жените повеќе да се поддржуваат меѓу себе, отколку да водат борба една против друга
Во продолжение се линковите од изнесувањата на сите учеснички на панелот „Родова еднаквост, меѓу декларациите и реалноста“.
Стојчевска: Да се работи за искоренување на патријархалното однесување кај младите
Фазли: Да ги научиме синовите да не ги тепаат своите девојки, отколку да ги учиме ќерките да бидат послушни
Митева: Да не молчиме на родово базираното насилство, бидејќи тоа не е приватна работа
Д. Тахири
