Европската комисија ја суспендирала исплатата на средствата од ИПАРД 3 програмата поради сериозни сомнежи за корупција поврзани со власта на ВМРО-ДПМНЕ, обвини СДСМ. И покрај тежината на одлуката, владата веќе десет дена молчи.
Како причина се наведуваат злоупотреби на европски пари, поради кои беше уапсен директорот на Агенцијата за финансиска поддршка во земјоделството и руралниот развој, Илија Стоилев – кадар на ВМРО-ДПМНЕ.
СДСМ бара случајот целосно да се расчисти и сите инволвирани да одговараат, особено лицата блиски до лидерот на ВМРО-ДПМНЕ, Христијан Мицкоски. Според опозицијата, одговорност мора да понесе и самиот Мицкоски за скандал од вакви размери.
Од партијата потсетуваат на периодот кога, по избивањето на скандалот, ВМРО-ДПМНЕ преку, како што велат, „фабрика за лаги“ ги обвинуваше претседателот на СДСМ, Венко Филипче, како и поранешни функционери, вклучително и Зоран Заев, кој веќе пет години е надвор од политиката.
„Дали сега е јасно зошто беа тие напади? За дефокус. За да се сокрие фактот дека ДПМНЕ е фатена во корупција со европски пари“, наведуваат од СДСМ.
Според нив, поради оваа корупција е нанесен директен удар врз развојот на земјоделството. Земјоделците и агробизнисите кои планирале или веќе започнале инвестиции, сега ризикуваат да останат и без пари и без проекти.
Скандалот со ИПАРД 3, програма вредна околу 130 милиони евра, според СДСМ, не е изолиран случај, туку дел од поширок корупциски модел. Како пример ги наведуваат 161 тендер во вредност од 5,3 милиони евра, како и доделени 9 милиони евра на фирма со само двајца вработени.
„Нив не ги интересираат земјоделците, туку криминалните тендери“, обвинува СДСМ.
Партијата бара брза, темелна и транспарентна истрага и целосна одговорност за, како што велат, „огромниот корупциски скандал“. „Работата не е завршена“, порачуваат од СДСМ.
Од друга страна, ВМРО-ДПМНЕ ги демантира обвинувањата, тврдејќи дека средствата од ИПАРД 3 не се суспендирани, обвинувајќи дека СДСМ шири лаги за ситни политички поени.
„Лага е дека се суспендирани средствата од ИПАРД програмата. Лага е дека се стопирани средствата. СДС лаже за да добие ситни политички поени. Нивните лаги веќе не поминуваат ниту кај малите деца.
Средствата од ИПАРД III Програмата не се суспендирани од страна на Комисијата.
Повеќе пати е потенцирано дека од страна на Европската Комисија е поздравена одлуката за привремен прекин на плаќањата. Институциите работат во разрешување на случајот. Веднаш по завршување на проверките и контролите, ќе се продолжи со реализација на ИПАРД III Програмата.
Од владејачката партија доваваат дека ги боли од опозицијата бидејќи институциите работат и преземаат активности согласно нивните надлежности, тоа што беше мисловна именка во нивно време.
Д. Муратов
