Директорот на Комисијата за односи со верските заедници и религиозни групи, г. Даријан Сотировски во разговор со ЦИВИЛ за меѓуетничката состојба во земјава, мултикултурата и европските вредности, стратегијата „Едно општество за сите“, и состојбите со дискриминацијата и поларизираноста на општеството.
ЦИВИЛ: Како ќе ја оцените меѓуетничката состојба во Северна Македонија?
Сотировски: Ние како држава веќе градиме едно ново поглавје во меѓуетничките односи, така што мислам дека состојбата е задоволителна, на едно високо ниво и присутна е тенденцијата на континуирано подобрување на ваквите односи, но се уште сме далеку кон посакуваните, како општество не можеме да речеме „е сега сме постигнале заокружување на сите стремежи што значат вистински соживот, градење на едно општество за сите… Но, дека тенденциите за подобрување на состојбите се присутни, апсолутно задоволува. Сметам дека имаме стабилни односи, стабилна состојба, и по овој пат, можеме да очекуваме и подобри и опипливи резултати за окото на секој граѓанин.
ЦИВИЛ: Кои се вашите заложби за промоција на мултикултурата и европските вредности?
Сотировски: Мултикултурните вредности се и европски вредности, но, се и македонски вредности, ако јас се прашувам, и балкански вредности, затоа што кога зборуваме за „наше, домашно“, обично му даваме некој негативен предзнак. Сметам дека историјата векови наназад, Балканот генерално гледано е место каде што културите и религиите се во една коегзистенција, така што мислам дека на верски план, ние имаме што да кажеме на остатокот од светот, затоа што тука никогаш не се продуцирале поделби меѓу луѓето, а кои се базирани на верска основа. Етничка да, јазична да, политичка најчесто, но религиска не, и практично тоа никогаш не се случило. Религијата била мостот по кој секогаш оделе овие меѓуетнички поделби, но религијата сама по себе не била причина за поделби. Напротив, во ситуации на, условно кажано пожар во општеството, била таа која била користена како вода за гасење на тој пожар. Сметам дека од наша призма, на делокругот на кој работиме, на нашите надлежности постигнати видливи резултати на постојан видлив дијалог на сите религиски заедници во државата, но и меѓу нив. Како државен орган контактираме и сме во постојана соработка со сите регистрирани верски групи, што не прави во една добра позиција да разговараме отворено, секојдневно формално и неформално со верските субјекти за отворените прашања, а такви се безброј, и од различен карактер во државата.
ЦИВИЛ: Каде ја идентификувате дискриминацијата и поларизацијата во нашата држава?
Сотировски: Тоа е деликатна тема и веројатно за тоа треба длабинска анализа, бидејќи дискриминацијата постои во секоја пора на општественото живеење, практично човековата заедница генерално како заедница во светот, е поврзана со дискриминација, се дискриминираат поединци, единки во таа општествена заедница, но се дискриминираат и цели општествени групи. Македонското општество не е имуно на тоа, можеме да сведочиме на различни форми на дискриминација но многу е важно дали тој начин, таа политика на дискриминација е дел од националната платформа, или дел од државната политика или се работи за изолиран случај, кога поединец се дискриминира или групи, се дискриминирани или дискриминираат. Сметам дека во нашето општество политиката на дискриминација е далеку од официјалните политики, таа е понекогаш испреплетена со нив. Исто така има обиди, не до крај успешни, но целосно да се искорени дискриминацијата во општеството, затоа што тоа е сепак негативна појава која што не го гледа човекот, туку гледа одредени аспекти од него.
ЦИВИЛ: Како го оценувате досегашното спроведување на Стратегијата „едно општество за сите“, и што според вас недостасува да се направи во наредната тригодишна стратегија?
Сотировски: Стратегијата е владин документ, а јас по функција сум бил член на политичкото тело за нејзиното спроведување, во првото политичко тело. Стратегијата за едно општество се надоврзува со еден бурен политички амбиент во државата, којшто требаше да премости одредени проблеми во општеството. Како документ е пример за тоа како стратешка определба на нашата влада да ги подобри односите. Сметам дека придобивките тука се пред се политички и декларативни, но во следниот период треба да очекуваме многу повидлива и по практична имплементација на проект која што ќе значи нешто повидливо. Многу е лошо кога добрите идеи се сведуваат на флоскули во очите на луѓето, иако тие, реално, менуваат работи. Мора да се подобри перцепцијата дека тоа во суштина ги менува работите на подобро. Прво ќе треба да ги видиме постигнатите резултатите по цели, сметам дека во наредниот период ќе се отпочне со тоа. Владата има задолжено и посебен национален координатор за тоа, сметам дека работата е во квалитетни раце, и дека следниот период ќе се надогради се што е постигнато, но и треба критички да се осврнеме на се што останало само на декларативни заложби, а не е спроведено на терен. Но, во многу сегменти досега, има подобрувања, но се разбира, има простор да се подобрува понатаму.
Дијана Тахири
Камера и фотографија: Дехран Муратов
Монтажа: Ариан Мехмети
Оваа содржина е дел од иницијативите и проектите на ЦИВИЛ за промоција на мултикултурализмот и европските вредности, со поддршка од Министерството за надворешни работи и европски прашања на Големото Војводство Луксембург. Ставовите и мислењата изнесени во овие содржини се на самите Автор(к)и и не нужно ги отсликуваат официјалните ставови на донаторите.