Националниот координатор за стратегиски комуникации во Владата, Марјан Забрчанец, на панел дискусијата „Слободни избори наспроти црната пропаганда“ која денеска ја организира ЦИВИЛ зборуваше за Националната стратегија за комуникации и за тоа колку Владата има волја да се справи со овие немили појави со кои се соочуваме во изминатите години.
„Владата е сериозно алармирана од појавата на црната пропаганда и сметаме дека во моментов во општеството постои можност за бунт насочен кон дезинформациите“, вели Забрчанец.
Тој изјави дека ширењето лажни вести повеќе не е мејнстрим политика, црната пропагандата не е мејнстрим политика.
„Сега гледаме едно поинакво однесување од оној период во кој бевме навикнати на нешто друго. Има сериозна промена во општествениот амбиент. Политиките на црната пропаганда се туркаат кон маргините на општеството. Секој може да зборува слободно и гласно, да ја критикува и власта и оние кои се дрзнуваат да шират дезинформации“, вели Забрчанец.
Тој зборуваше и за најсвежиот пример каде поранешен министер прошири вест дека 5 милиони евра се потрошени за кетеринг за Државниот архив, а нема пари за државна награда за ‘Медена земја’.
„Класична деизнформација. Ниту Архивот има толкав буџет, ниту е вистина дека нема награда за ‘Медена земја’. Има награда. Не е од Министертсвото за култура, туку од друга фиока од буџетот, но наградата е обезбедена“, вели Забрчанец.
Тој смета дека кога поранешни функционери сподделуваат лаги тие се соочуваат со јавноста.
„Ние имаме разбудено граѓанско општество и свесни граѓани кои знаат да препозанаат лаги и дезинформации. Дигиталното време ни овозможува критичката јавност да демонстрира отпор кон лажните вести“, вели Забрчанец.
„Владата затана во одбрана на вистината и кричката јавност. Ставивме предлог акциски план за креирање на национална стратегија за транспарентност по која работиме. Се уште постојат заробени институции како јавниот радиодифузен сервис, но прашање на време е кога тие трендови ќе стигнат што пошироко и подалеку во општеството.
Воведовме конкретни политики и практики. МИМ со години се бореше оваа тема да ја направи важна., како воведување на медиумска писменост во образованието. Целта ни е во 2021 да почне да се појавува како содржина во образовниот систем. Тоа е влог за идните генерации“, изјави тој.
Забрчанец е дециден дека дезинформациите се опасност за демократијата.
„Тие работат врз принципот на поттикнување на емоции коишто водат кон омраза, но и насилство. Пример е бранењето на споменикот на Александар Македонски од наводен „бугарски кран“. Да, лажењето не е кривично дело, но што кога лажната вест поттикнува кривично дело?“, вака Забрчанец го заврши првиот дел од своето обраќање, оставајќи простор за размислување и дебата.
Според Забрчанец капацитетот на општеството е поголемо од она на државата.
„Она што можат граѓаните, организациите и медиумите да го направат за подобрување на состојбата е да пристапат кон владата со конкретни иницијативи, да ги следат енер можностите кои ги дава владата, да се создадат платформи за соочување на различни политички партии“, вели Забрчанец.
„Граѓаните можат да ја видат разликата меѓу вистината и пропагандата, политичките партии имаат голема улога, тие се на широк мегдан на јавноста, ние веќе немаме национални медиуми кои отворено навиваат за една полиција опција, можеби една, мислам дека тоа е неутрализирано многу повеќе од порано, победникот на овие избори ќе се одлучува на социјалните мрежи“, додава Забрчанец.
Забрчанец вели дека останува на моќта и волјата на политичките партии дали ќе одберат социјалните мрежи да ги користат за промоција на своите програми или некои подземни структури тие групации ќе ги користат за оцрнување на противникот и ширење на црна пропаганда.
„Јавноста ќе има можност да препознае која политичка партија што користи“, додава Забрчанец.
М. Ивановска / А. Петровска
