На денешната конференција која ја организираше Комитетот за заштита на правата, се обратија еминентни правници кои застануваат зад идејата за фер и правично судење. Професорката Беса Арифи, професорите Гордан Калајџиев, Љубомир Фрчковски, и поранешниот министер за внатрешни работи Павле Трајанов, кои се дел од експертскиот тим на Комитетот кој упати свои сугестии за реформите во судството, денеска им ја дадоа својата поддршка на жртвите на политички прогон во земјата.
На Конференцијата се дискутираше за прашањата кои се дел од стратегијата за реформи на правосудството 2017-2021 со акционен план, во чие дополнување со свои предлози зеде учество и Комитетот.
Конференцијата ја отвори д-р Маријан Маџовски, претседател на Комитетот за заштита на правата, кој нагласи дека оваа асоцијација ја претставуваат членови од речиси сите политички монтирани случаи.
Почесниот претседател на Комитетот, господинот Слободан Богоевски, во својот воведен збор ги поздрави сите жртви на политички прогон во изминатите 11 години, потсетувајќи дека и самиот тој е дел од тој систем на „тираниско владеење и систем на брутална суспенизија на уставниот поредок и кршење на законите со тешки последици по судбините на луѓето“.
„Никој од нас и нашите семејства, кој ги издржал притворите, затворите, никогаш нема да бидат исти пред и по нанесените неправди. Нам никој не може да ни го врати изгубеното здравје, никој не може да ни ги врати луѓето кои починаа во притвор, во затвор, или беа пуштени да умрат дома за да не се зголеми статистиката на починати лица во затворите“, рече Богоевски.
Професорот Љубомир Фрчковски истакна дека не може да има нов почеток без да има правда
„Ние мора да направиме гест на дисконтинуитет со режимот кој беше базиран врз насилие и монтирани случаи, кој беше базиран врз насилство и партизација, која не доведе до состојба на украдена држава, чии жртви се конкретни луѓе со конкретни имиња, а не државата како ентитет“, истакна Фрчковски.
Професорот Гордан Калајџиев вели дека овој тип на политички монтирани процеси, ниту е нов, ниту е симболичен, ниту пак се сретнува само во Македонија.
„За жал, оние на кои сме им дале серизони овластувања да одлучуваат за човековите судбини, повеќе или помалку, секогаш знаеле да ги злоупотребуваат. Она што е карактеристично за Македонија, се димензиите што не снајдоа во овие злоупотреби и во тоа што тие прераснаа во систем на едно тоталитарно општество каде судовите наместо да ги штитат граѓаните станаа алатка на политичката елита, којашто израсна во едно сериозно злосторничко здружување“, истакна Калајџиев.
„Ова е најважната иницијатива, којашто треба да добие глас во ова време“, рече професорката Беса Арифи, „бидејќи длабоко сум уверена дека без да се воспостави правда за овие случаи за коишто говориме денес воопшто нема да постои правда во Република Македонија. Втората најважна работа е што овие случаи ни покажаа дека како општество може да имаме многу проблеми, но имаме еден проблем кој не поврзува сите, без разлика на нашата етничка припадност“.
Павле Трајанов потсети дека пред две години како пратеник предложи Закон за амнестија, и дека овој закон е подготвуван доста долго, дека се направени сите истражувања и споредбени податоци и влезе во собраниска процедура, каде имаше огромна поддршка, но тогашната владејачка партија започна силна кампања дека ако овој закон помине во Парламентот ќе се нарушат стабилноста и безбедноста на земјата.
„Јас верувам дека ќе добиете силна поддршка во Советот за реформи на судството и дека на сите вас ќе ви се обезбеди фер судење, и верувам дека голем дел од вас ќе имате и општествена и правна рехабилитација“, им се обрати Трајанов на присутните.
По обраќањето на правните експерти, на конференцијата се обратија и дел од жртвите на овие политички монтирани случаи, како и членови на нивните семејства.
Маја Ивановска
Камера: Дехран Муратов