Високи претставници на Пентагон пристигнаа во Украина за да „разговараат за напорите за завршување на војната“ со Русија, соопшти американската војска.
Се очекува тимот, предводен од секретарот на американската армија, Ден Дрискол, да се сретне со украинскиот претседател Володимир Зеленски во Кијив во четврток. Потоа се очекува делегацијата, е највисоката воена група што патува во Украина откако Трамп ја презеде функцијата во јануари, да отпатува во Москва за да разговара со руски претставници.
Американскиот претседател Доналд Трамп презема уште еден притисок за завршување на војната на Русија против Украина, додека Вашингтон започнува со тестирање на нова мировна рамка што веќе предизвика вознемиреност кај украинските претставници поради извештаите дека мировен план на САД и Русија од 28 точки, наводно содржи големи отстапки од Украина.
Новиот рамковен мировен план меѓу САД и Русија, кој бара значителни отстапки од Украина, вклучително и откажување од територијата што сè уште ја контролира и драматично намалување на големината на нејзината војска се појавија во средата, на денот кога најмалку 26 лица беа убиени, а уште 22 лица се водат како исчезнати по рускиот ракетен и беспилотен напад врз станбени блокови во западниот украински град Тернопил.
Повикувајќи се на луѓе запознаени со ова прашање, „Аксиос“, „Фајненшл тајмс“ и „Ројтерс“ објавија дека плановите предвидуваат Киjив да се откаже од областите на Донбас во источна Украина што сè уште ги контролира, значително да ја намали големината на своите вооружени сили и да се откаже од голем дел од своето оружје.
Ниту Вашингтон ниту Москва официјално не го потврдија новиот мировен план, изготвен од претставникот на претседателот Доналд Трамп, Стив Виткоф, и рускиот специјален претставник Кирил Дмитриев, виш економски преговарач на Русија.
Извор на Axios во администрацијата на Трамп потврди дека САД веќе ги информираат претставниците од Украина и Европа за планот.
Вашингтон сигнализираше дека се очекува Украина да прифати рамка за завршување на војната што би барала од Кијив да се откаже од територија и од одредени системи на оружје. Пријавените предлози, меѓу другите отстапки, вклучуваат и намалување на украинската армија.
Извор во Кабинетот на претседателот беше дефинитивно неентузијастичен за можниот план кога разговараше со Кијив Индипендент, додавајќи дека Вашингтон се чини дека се движи кон рамка усогласена со барањата на Москва.
За време на претходните рунди разговори, Кремљ ги омекна некои од своите максималистички барања, ограничувајќи го својот фокус на територијални отстапки од Украина. Сепак, барањата што претходно беа отфрлени, се чини дека повторно се појавуваат.
Извор на Кијив Индипендент, запознаен со предлогот на САД, рече дека Кремљ ги зацврстил своите максималистички услови, чувствувајќи ја влошената позиција на Украина на фронтот и искористувајќи ги последиците од големиот корупциски скандал во кој се вклучени луѓе блиски до претседателот Володимир Зеленски.
Во контекст на разговорите што се водат на политичко ниво, сега се чини дека се оформува и паралелен мировен пат предводен од војската на САД.
Украински функционер изјави за Си-Би-Ес, американскиот медиумски партнер на Би-Би-Си, дека разговорите за време на патувањето ќе се фокусираат на воената ситуација на терен – како и на плановите за евентуално прекин на огнот.
Неименуваниот функционер рече дека Зеленски и Трамп веќе се согласија да го запрат конфликтот по постојните линии на ангажман и постојат договори за давање безбедносни гаранции.
Последните директни разговори меѓу Кијив и Москва се одржаа пред речиси четири месеци. Фундаменталните позиции на двете страни во меѓувреме остануваат непроменети.
Сепак, американскиот државен секретар Марко Рубио напиша на X дека постигнувањето „траен мир ќе бара од двете страни да се согласат на тешки, но неопходни отстапки. Затоа ние развиваме и ќе продолжиме да развиваме список на потенцијални идеи за завршување на оваа војна врз основа на придонесите од двете страни во овој конфликт“.
Кијив, поддржан од европските влади, врши притисок за прекин на огнот по постојната линија на фронтот. Москва продолжува да инсистира Украина да ги отстапи источните области Донецк и Луганск.
Шефицата за надворешна политика на ЕУ, Каја Калас, предупреди во четврток дека за да функционира каков било план, ќе треба да ги има Украинците и Европејците на чело, а францускиот министер за надворешни работи, Жан-Ноел Баро, рече дека „Украинците не сакаат никаква форма на капитулација“.
Се верува дека ниту европски ниту украински функционери не биле вклучени во разговорите.
Како Украина се откажа од своето нуклеарно оружје – и што тоа значеше за инвазијата од страна на Русија
Украина претходно веќе еднаш прифати сличен план за делумно разоружување кога го префрли своето наследено советско нуклеарно оружје на Русија по распадот на Советскиот Сојуз, завршувајќи го процесот до 1996 година, како дел од Будимпештанскиот меморандум од 1994 година, каде што Украина се согласи да стане ненуклеарна држава во замена за безбедносни гаранции од Русија, САД и Обединетото Кралство.
Меморандумот од Будимпешта го потпишаа лидерите на Соединетите Американски Држави, Бил Клинтон, Русија (Борис Елцин) и Обединетото Кралство (Џон Мејџор), и на Украина, Леонид Кучма. Безбедносни гаранции беа дадени во замена за откажување на Украина од своето нуклеарно оружје од советската ера и пристапување кон Договорот за неширење на нуклеарно оружје.
Но, безбедносните гаранции во Меморандумот од Будимпешта траеја само 20 години, сè додека Русија не ги прекрши тие ветувања (и другите договорни обврски според Хелсиншкиот завршен акт и Повелбата на ОН) со анектирање на Крим во 2014 година, а потоа и со инвазија на Украина во 2022 година.
Иако постоеше механизам за консултации предвиден во меморандумот доколку се појават какви било проблеми, и тој беше мобилизиран за прв пат на 4 март 2014 година, Русија сепак еднострано го прекрши, пишува НПР.
Значи, имаше состанок на потписниците на меморандумот што го свика Украина и тој се одржа во Париз. И министерот за надворешни работи на Руската Федерација, Сергеј Лавров, кој беше во Париз во тоа време, едноставно не се појави. Значи, тој дури и не дојде на состанокот во врска со меморандумот.
Русија тврдеше дека го потпишала меморандумот со друга влада, а не со оваа „нелегитимна“. Но, тоа, се разбира, не стои во никакви меѓународни правни критериуми. Не потпишувате договори со владата, туку го потпишувате со земјата.
Поучени од случувањата во историјата, Украинците со право се вознемирени од најновиот нацрт мировен предлог, составен во координација помеѓу САД и Русија, без учество на една од најзасегнатите страни, Украина и без претставници на ЕУ.
Драган Мишев
ЦИВИЛ МЕДИА | Ставовите и наодите во овој текст се целосна одговорност на авторите и не нужно ги претставуваат ставовите на донаторите или на другите партнери и соработници на организацијата.
