На денешен ден, 1908 год, во Битола заврши Битолскиот Конгрес на кој се создаде албанската стандардизирана азбука. Конгресот бил свикан на 14 ноември и на него присуствувале 160 делегати од Албанија, и од албанските заедници во Романија, Египет, Америка, Грција, Турција, Италија итн. За претседател на Конгресот бил избран Ѓерѓ Фишта, католички свештеник, писател и еден од најголемите борци за правата и културниот развој на Албанците. Секретарка на Конгресот била избрана Парасќеви Ќириази, учителка во женското училиште во Корча, како и уште дванаесет други членови, меѓу кои Митхат Фрашери, Ндре Мједа, Григор Чилку и други. На Конгресот учевствувале Албанци од католичка, муслиманска, православна и протестантска вероисповест, со цел сите заеднички да создадат една единствена азбука.
На Конгресот е решено азбуката да се состои од 36 латински букви, којашто е во употреба до ден денес. За потребите на печатење на книги и весници со албанска азбука, во Битола тогаш се отворила и првата печатница, позната како Битолска Печатница, финансирана од група трговци – Албанци муслимани. Печатницата работела со една рачна електрична машина, со која се печателе буквари, училишни текстови и неделниот весник „Башкими и Комбит“ ( „Национално Единство“). Од печатницата денес нема никаква трага.
Зградата во која се одржал Битолскиот Конгрес, денес е Музеј на албанската азбука, и е ентериерно реконстуриран. Во него се поставени фотографии и повеќе од 230 документи во дигитална и хартиена форма со кои се афирмираат преродбеничките, културолошките и напредните движења на албанскиот народ.
Музејот на албанската азбука во Битола во последните неколку години беше мета на вандалистички напади, од непознати сторители.
Денес се одбележува 109 годишнината од Битолскиот Конгрес за албанската азбука, со многу активности од државен карактер, посети на Музејот, и е неработен ден за Албанците во Македонија.
