Претседателот на САД, Доналд Трамп, одржа маратонска самостојна прес-конференција, која траеше 80 минути. Ваквата постапка ја оправда преку напад на американските медиуми, обвинувајќи ги дека шират невистини и манипулации за работата на неговата администрација.
„Јас сум денеска тука за да го информирам американскиот народ за неверојатниот напредок кој е постигнат во последните четири недели од мојата инагурација. Ние направивме неверојатен напредок. Јас мислам дека досега никогаш немало претседател кој во толку краток временски период направил онолку, колку што ние направивме“, рече Трамп повикувајќи се на новата анкета на Расмунсен, според која неговиот рејтинг е искачен на 55% и е во постојан раст.
„Ја одржувам оваа прес-конференција за да му се обратам директно на американскиот народ, преку присутните медиуми, што е огромна чест за мене, бидејќи многу од нашите национални репортери и луѓе нема да ви ја кажат вистината и не ги третираат извонредните луѓе на оваа земја на начинот на кој треба да бидат третирани, со сета почит која ја заслужуваат. Се надевам дека во иднина ќе биде малку поинаку и дека ќе се согласуваме барем малку подобро, ако тоа е возможно. Можеби нема, и тоа е во ред.
За жал, многу од медиумите во Вашингтон, заедно со Њујорк, Лос Анџелес, не зборуваат за народот, туку за одделни интереси и за оние кои профитираат од еден очигледно многу расипан систем. Печатот стана толку неискрен што ако не сакаме да зборуваме за тоа, ќе му направиме многу голема контра-услуга на американскиот народ – огромна штета. Мора да зборуваме за она што се случува, затоа што искреноста на печатот е надвор од контрола. Нивото на неискреност е надвор од контрола.
Јас се кандидирав за претседател за да ги претставувам граѓаните на нашата земја. Јас сум тука да го променам системот кој не фукнционира, за да им служи добро ним, и на нивните семејства. Зборувам, навистина зборувам, за оваа вградена структура на моќ, она што ние го правиме е – зборуваме за оваа структура на моќ, зборуваме за нејзината вкоренетост. Како резултат на тоа, медиумите минуваат низ она што мора да го поминат и честопати да ја нарушат оваа структура – не постојано – некои медиуми се фантастични, морам да признам, чесни и одлични. Но, повеќето не се. И ќе зборуваме за тоа. Можете да ми поставите прашања за тоа.
Но, ние нема да дозволиме тоа да се случи, затоа што јас сум тука да ја пренесам мојата порака директно до американскиот народ. Како што знаете, нашата администрација наследи многу проблеми во владата и во економијата. Да бидам искрен, јас наследив неред – хаос е – и дома и надвор. Хаос. Работни места се исфрлаат надвор од земјата. Гледате што се случува со сите компании кои ја напуштаат нашата земја, се случува во Мексико и на други места – ниски плати. Масивна нестабилност во странство, без оглед каде ќе погледнете. На Блискиот Исток, катастрофа. Северна Кореја – ќе се погрижиме за тоа, народе. Ние треба да се погрижиме за сето тоа. Јас само сакам да знаете дека ми остана хаос.
Почнувајќи од првиот ден, нашата администрација отиде да работи за да се справи со овие предизвици. Во однос на надворешната политика, ние веќе започнавме енормно продуктивни разговори со голем број странски лидери – многу од нив „покривте“ – со цел да се движиме напред кон стабилноста, безбедноста и мирот во најслабите региони на светот, а ги има многу.
Со други зборови, медиумите се обидуваат да ја нападнат нашата администрација затоа што тие знаат дека се водиме од ветувањата кои ги дадовме, и тие не се среќни поради тоа, од која било причина. Но, многу луѓе се навистина среќни. Всушност, јас ќе бидам во Мелбурн, Флорида, во пет часот во сабота, и слушнав дека огромна маса луѓе сака да биде таму.
Го вклучувам телевизорот, ги отворам весниците, и гледам хаотични приказни. Хаос. А она што се случува е сосем спротивно. Оваа администрација работи со полна пареа, и покрај фактот што не можам да добијам одобрување за мојот Кабинет, а тие се извонредни луѓе. Како сенаторот Дан Коутс кој е еден од напочитуваните луѓе на Сенатот – а не може да добие одобрување. Како да не се одобри? Тој е високопочитуван колега – брилијантен човек, секој го знае тоа – но, чека за одобрување.
Значи, имаме извонредна група на луѓе кои работат многу мактрпно, а се погрешно интерпретирани во јавноста, и ние не можеме да дозволиме да се случи тоа. Па, на демократите единствено нешто што им остана е да пролонгираат, после се што направија, верувајте ми!“, се обрати претседателот Трамп на новинарите, пред да започнат новинарските прашања.
Еден од присутните новинари го праша: „Во текот на кампањата, дали некој од вашиот тим комуницираше со членови на руската влада или руската интелигенција? И ако да, која е природата на овие разговори?“
„Па, неуспешниот ‘Њујорк Тајмс’ напиша голема, насловна сторија вчера. И беше многу дискредитирана, како што знаете. Тоа е – тоа е шега. И луѓето спомнати во сторијата – забележав дека денес беа на телевизија, велејќи дека никогаш не зборувале со Русија. Тие дури не беа дел – мислам беа толку мал дел – јас не сум зборувал со нив. Мислам на таа една личност, јас никогаш не сум зборувал со него. Мислам дека никогаш не сум го сретнал. И тој, всушност, кажа дека бил член на многу ниско ниво, мислам, комитент за краток временски период. Јас не мислам дека некогаш сум се запознал со него. Никогаш не сум зборувал со него. И тој исто мисли дека е шега.
Другата личност рече дека никогаш не зборувала со Русија, никогаш добил повик. Погледнете ги неговите телефонски записи, и така натаму. И другата личност, луѓетоа знаеја дека ќе претставува повеќе различни држави. Тоа е тоа што тој го прави. Мислам, луѓето го знаат тоа. Тоа е господионот Манафорт, кој, пред сé, е почитуван човек. Но, мислам дека тој ја претставуваше Украина, или украинската влада, или некого. Но сите – луѓето го знаеа тоа. Тој кажа дека нема апсолутно ништо, ниту некогаш имал нешто со Русија. И тој го изјави тоа многу силно. Ја видов неговата изјава. Повеќето од документите не се испечатени, бидејќи тоа не е добро за нивните приказни.
Значи, тројцата луѓе за кои тие зборуваат, комплетно ги отфрлаат ваквите приказни. И јас можам да ви кажам, зборувајќи за себе, јас не поседувам ништо во Русија. Немам долгови во Русија. Немам никакви договори во Русија. Претседателот Путин ми се јави и многу фино ми честиташе за победата на изборите. Потоа, повторно ми се јави и многу љубезно ми честиташе за инагурацијата, што е одлично. Но, истото го сторија и многу други лидери – речиси сите лидери, од речиси сите други земји. Тоа е тоа.
Русија е лажна вест. Русија – ова е лажна вест пуштена од медиумите. Вистинската, реалната вест е всушност, дека луѓето, веројатно од администрацијата на Обама, бидејќи тие се таму – сега, ние имаме наши луѓе кои влегуваат таму. Како што знаете, Мајк Помпео ја презема контролата врз ЦИА. Џејмс Комеј во ФБИ. Дан Коутс чека да биде одобрен. Тој е многу почитуван сенатор, а сé уште чека да биде одобрен. Но, нашите нови луѓе влегуваат внатре.
И кога сте веќе тука, бидејќи споменавте, ‘Вол Стрит Журнал’ направи сторија денес која е подеднакво засрамувачка како оваа на ‘Њујорк Тајмс’ од вчера. А зборува за – ја видовте, на насловна страна. Значи, претседателот на Националната разузнавачка агенција изјави – изглуми изјава: „Секоја сугестија дека американската разузнавачка агенција“ – ова е тоа што ни е сервирано – „крие информации, не обезбедувајќи ги надобрите разузнавачки информации до претседателот и неговиот тим за национална безбедност, не е точна“.
Значи, ја извадија оваа сторија на насловната страна – најгоре – и тие само напишаа дека сторијата не е точна. Да ви кажам нешто, ќе бидам искрен – бидејќи на некој начин уживам во ова напред–назад, претпоставувам цел живот ми било интересно, но не сум видел понеискрени медиуми од политичките. Мислев дека финансиските медиуми се многи подобри, поискрени. Но, ќе кажам дека јас никогаш не добивам телефонски повици од медиумите. Како пишуваат стории како оваа во ‘Вол Стрит Журнал’, без да ме прашаат мене? Или, како ја напишаа сторијата во ‘Њујорк Тајмс’, и ја ставаат на насловна? Исто како сторијата за мене и жените – насловна. Огромна сторија. Тоа беше грозно.
И потоа се јавуваат. Велат: ‘Ние никогаш не го рековме тоа. Ние го сакаме господинот Трамп’. Се јавуваат во мојата канцеларија. Тоа беше комплетно погрешна интерпретација на тие прекрасни жени, морам да ви кажам – тотално погрешно интерпретирано. Јас реков да објават демант. Никогаш не објавија. И, искрено, продолжив со други работи“, одговори Трамп, во продолжение на нападот врз американските медиуми.
Во расправа со еден од новинарите околу највисоките изборни маргини, Трамп беше обвинет од новинарот, дека располага со невистинити податоци. Откако му беа прочитани изборните резултати на Роналд Реган, Барак Обама и Џорџ Буш, претседателот Трамп само кратко изјави дека не знае дали податоците дека тој ги има највисоките маргини се точни, туку дека така му се дадени.
Следеше прашањето, од истиот новинар, како очекува народот да му верува дека информациите кои се пласираат во медиумите се невистинити, кога и тој самиот пласира невистинити податоци, Трамп одговори кусо: „Не знам. Мене ми беше дадена оваа информација. Сум ја видел наоколу. Но, е значителна победа! Се согласувате со тоа?“
„Вие сте претседател!“, возврати новинарот.
Трамп најави нова извршна наредба за забрана за влез во земјата. Наредбата ќе биде потпишана следната недела.