Поминаа триесетте денови пост од месецот Рамазан. Постот не е режим на исхрана, или диета, или натпревар за најдобар ифтар/вечера. Постот е посебна состојба на умот и телото која ги изострува сетилата, ги промовира добрите мисли и дела а ги забранува лошите. Со постот согледуваме работи кои вообичаено не ги забележуваме. Со постот ги забележуваме и совладуваме физичките препреки на нашето интелектуално делување, на нашето духовно воздигнување. Со постот ја гледаме цврстината на нашиот карактер, истрајноста на нашите намери и издржливоста на нашите умови и тела. Со постот повеќе го цениме нашето здравје, посебно оние кои здравствено не го издржале или биле спречени да постат. Со постот повеќе ги цениме водата, храната и благодатта во која живееме, но и повеќе ги разбираме жедните и гладните, преку што нашите емпатија и солидарност стануваат поголеми. Постот нè зближува преку зедничките вечери со нашите семејства, соседи, пријатели и колеги.
Постот е и воздржување од лоши мисли, зборови и дела. Целта на тоа е да се исчисти срцето на верникот од злоба, љубомора, завист и сè друго што нè прави нелуѓе.
На крајот од постот и молитвите секој од нас се споредува со себе си од минатите години, колку напредувал или колку заостанал во својот психо-физички, интелектуален и духовен развој.
Денес е Бајрам, празник за муслиманите, посебно за оние кои доследно го поминаа месецот Рамазан во пост и молитва. А во име на мултикултурализмот, празник е или неработен ден за сите граѓани, посебно за оние кои не извикуваа смрт за сограѓаните пред Собранието и на социјалните мрежи, туку им пружаа зборови на заштита, поддршка и надеж, кои со бел образ ќе им честитаат на соседите и без срам ќе вкусат од нивната баклава. Но и за тие другите, од пред Собрание, кои дождот ги трезни од омразата и национализмот, кои на пат за продолжениот викенд кон Солун со срам ќе пишат СМС: “Среќен празник комшија/колега, за многу години.” Празник е и за оние што одобрија да се казни училиште од провинција за една вечера, наместо да инвестираат во истото.
Нашите врати се отворени и има доволно баклава за сите, уште повеќе за покајниците, зашто тоа ни е традицијата која со векови нè обединувала и од која е погубно да се бега.
Честит Бајрам на тие што слават и мирен продолжен викенд за останатите!