Владата именуваше нови функционери и директори на органи, државни управи и казнено-поправни установи што се во нејзина надлежност.
Министерствата за здравство, финансии и животна средина, Агенцијата за вработување, Управата за културно наследство, како и КПУ Затворот во Струмица добија жени-функционерки, кои се најдоа на листата од 68 нови функционери и директори именувани од Владата. Во просек, на листата на функционери и директори се најдоа само 11,8 % односно 8 жени. Во парламентот има само 39 пратенички, а на министерско ниво се наоѓаат само четири жени.
Родовиот баланс, родовите прашања и вклучувањето на жените во политиката, според реакциите во јавноста и на социјалните мрежи, не се проритетни и не се во фокусот ниту на новата влада.
Минатата година, меѓу многуте дилеми што се наметнаа во контекст на очекувањата доколку се промени власта, а во пресрет на предвремените парламентарни избори, ЦИВИЛ – Центар за слобода одржа дебата на тема „Жените во политиката“ на која се зборуваше за родовата еднаквост, правата на жените, како и за степенот на вклученост на жените во политиката.
Министерката за одбрана, Радмила Шеќеринска, во интервју за ЦИВИЛ Медиа во тоа време изјави дека целта, која ќе биде рефлектирана и во владината програмата, е до 2020-та година, да се оди кон паритет, односно 50:50 проценти, како шанса проблемите на жените повеќе да дојдат до израз.
Претседателот на ЦИВИЛ, Џабир Дерала, пак, за ова прашање потсети: „Уште во времето кога функционираше како неформална група граѓанки и граѓани, во 90-те години на минатиот век, ЦИВИЛ се залагаше за односот минимум 51:49 во корист на жените, со што ќе се рефлектира застапеноста на жените во популацијата. ЦИВИЛ во своите ставови во јавноста во тоа време одеше и подалеку и го промовираше начелото и на позитивна дискриминација, односно дека разликата може да биде и поголема во корист на жените, поради потребата да се надокнадат историските непревди кон жените. Тоа никогаш не наиде на позитивен одѕив кај властите и партиите“.
„Родовиот баланс е исклучително важен показател за демократскиот капацитет на една земја, за политичката култура и нивото на општествениот развој во една земја. Тоа што го гледаме наназад со децении е крајно лоша застапеност на жените во политика, односно катастрофално лоша застапеност на жени на раководни функции во институциите. Тоа е последица од дискриминаторската политика на политичките партии, но и на заостанатоста и ниската политичка култура во општеството“ – коментира Дерала.
Пораките од минатогодишната дебата во организација на ЦИВИЛ, беа во насока на активна соработка меѓу граѓанското општество и политичарките и поагресивен настап за подобрување на позицијата на жената во општеството, во процесите на донесување одлуки и во политиката. Пред една година, на истата дебата, беше изразен и сомнеж дека со промените, ќе се подобри ситуацијата во однос на родовите прашања. За жал, тие сомнежи се обистинија.
Биљана Јордановска
