ВЕСТ НА ДЕНОТ
Состанок на Експертската мрежа на ОБСЕ во Скопје
Претседавачот со ОБСЕ и министер за надворешни работи, Бујар Османи денеска денеска го отвори состанокот на Експертската мрежа на ОБСЕ – Стратегиско предвидување во променлива средина: Перспективи за соработка и безбедност во Европа – Градење на експертска мрежа на ОБСЕ што се одржува во Скопје.
Формирањето на Експертската мрежа на ОБСЕ претставува уште една одредница постигната во рамки на Претседавањето на Северна Макеоднија со ОБСЕ во 2023 година. Оваа мрежа има за цел да ги истражи бројните динамични трендови на соработка во областа на безбедноста во Европа и клучната улога што ја имаат организациите како ОБСЕ и тинк-тенковите во обликувањето на политиките во овој критичен домен
ИЗЈАВА НА ДЕНОТ
„По оваа нова геостратешка динамика што ја имаме во Европа, клучниот збор е интеграцијата, не само во ЕУ туку и во НАТО. Затоа интеграцијата мора да се случува во политичкиот дел, но и во економскиот дел. И затоа ние цврсто го поддржавме и го побаравме Планот за раст на Западен Балкан од претседателката на ЕК Урсула фон дер Лајен, бидејќи тој се потпира и лежи врз придобивките на интергарцијата. Една работа е сигурна. По оваа нова геостратешка динамика што ја имаме во Европа, клучниот збор е интеграцијата, не само во ЕУ туку и во НАТО, затоа што веројатно две од најразвиените земји во Европа, Шведска и Финска, сега сакаат да се приклучат на НАТО. Една од нив е веќе членка а една е во процес на ратификација. Истото важи и за ЕУ“, изјави премиерот Димитар Ковачевски на панел- сесијата „Градење економска соработка во тешки времиња“, во рамки на 20-от Виенски економски форум.
ВОЈНА ВО УКРАИНА
Шефот на германското Министерство за одбрана, Борис Писториус, ја потврди намерата на германската влада да ја удвои одбранбената помош за Украина во текот на следната година. Писториус истакна дека таквата одлука не е поврзана ниту со фактот што вооружените сили на Украина се принудени да преминат на одбрана поради недостаток на ресурси, ниту со фактот дека САД ги намалуваат пакетите за помош.
КОНФЛИКТИ
Предвремено родените бебиња во најголемата болница во Газа се завиткуваат во фолија и се ставаат покрај топла вода во очајнички обид да се одржат во живот, предупреди директорот на болницата, додека израелската огнена моќ продолжува да ги удира околните улици и преостанатите резерви на гориво се сушат, оставајќи го објектот неспособен да функционира.
ФЛЕШ ВЕСТИ
СОБРАНИЕ Пратеници од партиите Демократско движење, Движењето Беса и Алтернатива кои се дел од коалицијата Европскиот сојуз за промени од денеска ќе делуваат во една пратеничка група, чиј координатор ќе биде пратеничката Сафије Садики Шаини.
БРИСЕЛ Темата на Состанокот ЕУ – Западен Балкан што ќе се одржи попладнево во Брисел со кој ќе претседава високиот претставник на Унијата за надворешни работи и безбедност Жосеп Борел, а на кој се поканети министрите за надворешни работи од регионот е поврзана со случувањата на Блискиот Исток и во Украина.
ОДБЕЛЕЖУВАЊЕ Скопје одбележува 79 години од Денот на ослободувањето
АЛ -ПРЕС
Редакциски избор од албански медиуми: Евакуирани првите албански државјани од Газа; продолжува мега-акцијата „Темпули“; на затворено рочиште ќе сведочи 36-от сведок против поранешните водачи на УЧК; Зошто Србија затвораше албански училишта, но не и медреси?
ЦИВИЛНИ АКТИВНОСТИ
Претставници на ЦИВИЛ – Центар за слобода денеска се сретнаа со Претседателот на Собранието, Талат Џафери, на која разменија информации и ставови за клучни прашања поврзани со актуелните состојби и процеси во земјата и пошироко. Меѓу другото, претставниците на ЦИВИЛ го информираа Претседателот на Собранието за улогата и поддршката на организацијата во иницијативите поврзани со Украина, вклучително и прашањето на Гладоморот, како геноцид против украинскиот народ. Понатаму, на средбата со Џафери стана збор и за војната на Блискиот Исток и цивилните жртви предизвикани од терористичкиот напад на Хамас во Израел и израелскиот воен одговор и страдањата на цивилите во Појасот Газа.
ДЕЗИНФОРМАЦИИ
„Една од главните забелешка во Извештајот на Европската комисија за напредок на Северна Македонија во 2023 година се однесува на заканите од дезинформаци, хибридните напади и странско влијание во македонскиот медиумски простор. Комисијата констатира дека сегашните мерки за борба против дезинформации не се многу ефикасни. и треба да се подобри разбирањето на јавноста за ризиците од дезинформации, како и вештините за медиумска писменост во општеството“, пишува Драган Мишев во „Дезинформациите и манипулациите во македонските медиуми не стивнуваат, на мета безбедноста на граѓаните“
СЛОБОДНА ЗОНА
„Судијката што преку случајот ИРЛ го осуди новинарството всушност го осуди и судот, а судот ја поништи правдата и тоа е тој затворен македонски транзициски криминоген круг во кој царува моќтта на корупцијата чии зависници се и државата и општеството и која, кажано во оваа една реченица, ги иссели умните, ги запусти сегашноста и иднината и за која лек ниту се наѕира зашто просторот на правдата е окупиран од типки и типови кои, без интеграции, наместо на неправдата и натаму ќе продолжат комотно и без трунка скрупули да и’ судат и да и’ пресудуваат на правдата!!“, вели Зоран Иванов ПО ДОПРЕН ГЛАС.
Б. Јордановска
